ԱՄՆ-ն Աֆղանստանում, Իրաքում և Սիրիայում ռազմական գործողությունների վրա ծախսել է շուրջ 1,5 տրիլիոն դոլար

Իրաքում, Սիրիայում և Աֆղանստանում ԱՄՆ-ի ռազմական գործողությունների վրա ծախսվել է ավելի քան 1,5 տրիլիոն դոլար։ Այս մասին ասվում է Պենտագոնի հրապարակած հաշվետվության մեջ։  

«2001 թ․ սեպտեմբերի 11-ից մինչև այսօր ԱՄՆ-ի պաշտպանության  նախարարությունը ռազմական գործողությունների վրա ծախսել է մոտ 1,5 տրիլիոն դոլար», - ասվում է հաշվետվության մեջ, որը հրապարակել է CNBC հեռուստաալիքը։

Այս ամբողջ ծախսերի 49%-ը, կամ 731 միլիարդ դոլար, բաժին է ընկել Իրաքում ռազմական գործողությունների ծախսերին։ Սրան հաջորդում է պատերազմն Աֆղանստանում՝ 584,3 միլիարդ դոլար կամ ամբողջ ծախսերի 39%-ը։ Ամենաքիչ միջոցները ծախսվել են Սիրիայում ռազմական գործողությունների վրա՝ 23,5 միլիարդ դոլար։

Աֆղանստանի պատերազմը, որն սկսվել է 2001 թ․ հոկտեմբերին, դարձել է Միացյալ Նահանգների զինված ուժերի համար ամենաերկարատևը ողջ պատմության ընթացքում։ Ներկայում Աֆղանստանում հաշվվում է շուրջ 14 հազար ամերիկացի զինծառայող։ Ռազմական գործողությունների ամենաթեժ ժամանակահատվածում՝ 2011 թ․, այս երկրում կար ավելի քանի 100 հազար ամերիկացի զինառայող։

ԱՄՆ զինված ուժերի հրամանատարությունը և հետախուզությունը վերջին ժամանակներս բազմիցս հայտարարել է, որ, չնայած գործադրված ջանքերին, այնուամենայնիվ Աֆղանստանում իրավիճակը մտել է փակուղի։

Սադամ Հուսեյնին իշխանությունից հեռացնելու նպատակով ԱՄՆ-ի ներխուժումն Իրաք տեղի է ունեցել 2003 թվականին։ 2014 թ․ ԱՄՆ ռազմաօդային ուժերը Իսլամական պետությանը ռմբակոծելու նպատակող մտել են Սիրիա։ Աֆղանստանում, Իրաքում և Սիրիայում պատերազմներին մասնակցել է ընդհանուր հաշվով շուրջ 2 միլիոն ամերիկացի զինվոր և սպա։ Այս գործողությունների հետևանքով ամերիկյան կողմի մարդկային կորուստների թիվը կազմում է շուրջ 6,8 հազար։ Վիրավորումներ են ստացել ավելի քան 52 հազար զինծառայող։