Չինաստանում ամենագնացը վրաերթի է ենթարկել մարդկանց բազմությանը․ հաղորդվում է ավելի քան մեկ տասնյակ զոհի մասին

Արտակարգ դեպք է տեղի ունեցել Չինաստանի Հունան նահանգում։ Անհայտ անձն ավտոմեքենայով մխրճվել է մարդկանց բազմության մեջ, ինչի հետևանքով զոհվել է 11 մարդ։ Այս մասին գրում է Ռիա Նովոստի-ն՝ հղում կատարելով չինական աղբյուրներին։

Ավելի վաղ հաղորդվում էր 9 զոհի և 46 վիրավորի մասին։

«Սեպտեմբերի 12-ին Չինաստանի Հունան նահանգի Հենյան բնակավայրում տեղի է ունեցել արտակարգ դեպք․ միտումնավոր վրաերթի են ենթարկել մի խումբ մարդկանց։ Սեպտեմբերի 13-ի ժամը 10:00-ի դրությամբ՝ կա 11 զոհ և 44 վիրավոր», - ասվում է քաղաքային իշխանությունների տարածած հայտարարության մեջ։

Նշվում է, որ դեպքը տեղի է ունեցել 19:35-ի սահմաններում։ Ականատեսները պատմում են, որ կարմիր գույնի ամենագնացը անհայտ պատճառով սկսել է շարժվել տեղի հրապարակում հավաքված մարդկանց բազմության ուղղությամբ և վրաերթի ենթարկել նրանց։

Իրավապահներին հաջողվել է վնասազերծել և ձերբակալել հանցագործին։ Նրա արաքի դրդապատճառները դեռ հայտնի չեն։ Հաղորդվում է, որ տղամարդը նախկինում ազատազրկված է եղել։ Ընթանում է հետաքննություն։