Սիրիա է ուղարկվել ռուսական Ս-300 զենիթահրթիռային համակարգեր (տեսանյութ)
ՌԴ պաշտպանության նախարարությունը տեսանյութ է հրապարակել, որտեղ երևում է, թե ինչպես են Սիրիա տեղափոխվում Ս-300 զենիթահրթիռային համակարգերը։ Տեսանյութը ցուցադրվել է Россия 24 և Звезда հեռուստաալիքներով։
Ռուսական զենիթահրթիռային այս համակարգը Սիրիայի Հմեյմիմ ավիաբազա է տեղափոխվել ՌԴ պաշտպանության նախարարության Ан-124-100 Руслан ինքնաթիռով։
Հոկտեմբերի 2-ին ՌԴ անվտանգության խորհրդի նիստի ժամանակ պաշտպանության նախարար Սերգեյ Շոյգուն նախագահ Վլադիմիր Պուտինին զեկուցել էր, որ Ս-300 համակարգի՝ Սիրիա մատակարարման շրջանակներում Հմեյմիմ ավիաբազա է ուղարկվել նաև 49 միավոր այլ զինտեխնիկա։ Նշվում է, որ այս մատակարարումն իրականացվել է Սիրիայում ռուս զինվորականների անվտանգությունն ուժեղացնելու նպատակով։
Սեպտեմբերի 24-ին Շոյգուն հայտարարել էր, որ իսրայելական ռազմաօդային ուժերի կողմից ռուսական Ил-20 ինքնաթիռի կործանումը ստիպել է Մոսկվային անվտանգության լրացուցիչ միջոցներ ձեռնարկել։
Սեպտեմբերի 28-ին Նյու Յորքում ՄԱԿ-ի Գխավոր Ասամբլեայի նստաշրջանի շրջանակներում ՌԴ արտաքին գործերի նախարար Սերգեյ Լավրովը հայտարարել էր, որ Մոսկվան արդեն սկսել է Ս-300 համակարգի մատակարարումը Սիրիային։