Անկարայում կարծում են, որ Սիրիայում ԱՄՆ-ի ռազմական ներկայությունը բարձրացնում է լարվածությունը տարածաշրջանում

Սիրիայում ԱՄՆ-ի ռազմական ներկայության պահպանումը կմեծացնի լարվածությունը տարածաշրջանում։ Այս մասին հայտարարել է Թուրքիայի նախագահի մամուլի խոսնակ Իբրահիմ Քալընը։

«Մենք գիտենք, որ Միացյալ Նահանգները քաղաքական տեսանկյունից ցանկանում է մնալ Սիրիայում։ Մենք գիտենք նաև, որ դա կհանգեցնի տարածաշրջանում լարվածության աճին, եթե նրանց ներկայությունը նման կերպ հիմնավորվի», - Անկարայում կայացած մամուլի ասուլիսի ժամանակ ասել է Քալընը՝ պատասխանելով Եփրատ գետի արևելյան ափին ամերիկյան ռազմական ներկայության մասին հարցին։

Ավելի վաղ Թուրքիան բազմիցս մեղադրել է ԱՄՆ-ին Սիրիայի քրդերին ռազմական աջակցություն ցույց տալու մեջ։ Հիշեցնենք, որ Անկարան վերջիններիս համարում է ահաբեկչական կազմակերպություն, որը կապ ունի Քրդստանի աշխատավորական կուսակցության հետ։