Աշխատանքն է սկսել Ֆրանկոֆոնիայի նախարարական 35-րդ համաժողովը

Ֆրանկոֆոնիայի 17-րդ գագաթաժողովի միջոցառումների շրջանակում անցկացվող նախարարական համաժողովը վերսկսեց իր աշխատանքները: Ինչպես հայտնում է «Արմենպրես»-ը, հոկտեմբերի 8-9-ին ընթացող համաժողովին մասնակցում են Ֆրանկոֆոնիայի անդամ երկրների արտաքին գործերի նախարարները:

Նախարարական համաժողովին ելույթ կունենա կազմակերպության գլխավոր քարտուղարը։

Աշխատանքների ավարտից հետո նախարարները կորոշեն նաև Ֆրանկոֆոնիայի նախարարական համաժողովի հաջորդ նիստի տեղն ու անցկացման վայրը: Համաժողովն իր աշխատանքներն իրականացնում է դռնփակ ռեժիմով:

Նախատեսվում է, որ հոկտեմբերի 9-ին Երևանում կբացվի Ֆրանկոֆոնիայի ավանը, որտեղ կազմակերպության անդամ պետությունների ներկայացուցիչները կցուցադրեն իրենց երկրների մշակութային բազմազանությունը։

Հոկտեմբերի 9-ից 12-ը Ծաղկաձորում տեղի կունենա Ֆրանկոֆոն մամուլի միջազգային միության 47-րդ նստաշրջանը։ Հոկտեմբերի 10-ին «Թումո» տեխնոլոգիաների կենտրոնում նախատեսվում է անցկացնել տնտեսական ֆորում՝ ՀՀ նախագահ Արմեն Սարգսյանի բարձր հովանու ներքո։

Հոկտեմբերի 11-ին՝ ժամը 19:30-ին Հանրապետության հրապարակում տեղի կունենա գալա համերգ, որը նվիրված կլինի աշխարհահռչակ շանսոնյե Շառլ Ազնավուրին։

Ինչպես հայտնում է «Արմենպրես»-ը՝ Հոկտեմբերի 11-12 կանցկացվի Ֆրանկոֆոնիայի 17-րդ գագաթաժողովը, որը կմեկնարկի բացման հանդիսավոր արարողությամբ: Գագաթնաժողովի օրակարգում Ֆրանկոֆոնիայի միջազգային կազմակերպության գլխավոր քարտուղարի ընտրության հարցն է: Գագաթնաժողովի թեման է «Ապրել միասին` հարգելով համերաշխությունը, մարդասիրական արժեքներն ու բազմազանությունը՝ իբրեւ խաղաղության եւ բարօրության հիմք ֆրանկոֆոն տարածաշրջանում»: Համընդհանուր արժեքների վրա խարսխված այս թեման հնարավորություն կտա արտացոլել Ֆրանկոֆոնիայում խաղաղությունը, համերաշխությունը եւ զարգացումը։ Որպես Ֆրանկոֆոնիայի 17-րդ գագաթաժողովի լոգո ընտրվել է նուռը՝ ի նշան ֆրանկոֆոն ողջ տարածքի խաղաղության եւ բարգավաճման։