Ռուսաստանը Կուբայում կտեղակայի տվյալների ստացման շարժական համակարգեր
Ռուսաստանը նախատեսում է Կուբայում տեղակայել օպտիկական և ինֆրակարմիր տիրույթներում Երկրի դիտարկման հեռահար զոնդավորման արբանյակների տվյալների ստացման շարժական համակարգեր։ Այս մասին տեղեկացնում է Ռիա Նովոստի-ն։
Նշվում է, որ շարժական համակարգն ստեղծվել է 2015 թ․ և անցել է պետական փորձարկումներ։ Համակարգերի վերջնական տեղակայումը և դրանց գործարկման աշխատանքները պետք է ավարտվեն մինչև 2019 թ․ ապրիլի 30-ը։ Այս համակարգերը տվյաներն ստանալու են «Ресурс-П», «Канопус-В» և «Канопус-В-ИК» տեսակի օպտիկական դիտարկման տիեզերական ապարատներից և կոդավորված ռեժիմով ուղարկելու են Մոսկվա։
Բացի այդ հաջորդ տարի «Роскосмос» ընկերությունը պատրաստվում է տվյալների ստացման ստացիոնար կայաններ տեղակայել Չուկոտկայում և Անտարկտիդայի «Прогресс» կոչվող ռուսական կայանում։
«Ресурс-П» տիեզերական համակարգը բաղկացած է երեք սարքերից։ Այն թույլ է տալիս տեսանելի և մերձավոր ինֆրակարմիր տիրույթում ստանալ օրական երեք անգամ հաճախականությամբ և 0.7 մետր թողունակությամբ ցանկացած բնույթի տեղեկատվություն։ Տիեզերական սարքերից ստացված տվյալներն օգտագործվում են ընդհանուր աշխարհագրական, թեմատիկ և տեղանքագրական քարտեզների կազմման և թարմացման, շրջակա միջավայրի քայքայման և աղտոտման նկատմամբ վերահսկողության, նավթի և այլ օգտական հանածոների հանքավայրերի որոնումների ընթացքում տեղեկատվության ապահովման նպատակներով։ Գերսպեկտրային արբանյակային լուսանկարների հիման վրա հնարավոր է որոշել անգամ ցորենի հասունության, ջրամբարում միկրոֆլորայի ակտիվության, ինչպես նաև հողի աղակալման աստիճանը։