Լեհաստանն ԱՄՆ-ի հետ կնքել է գազի մատակարարման պայմանագիր
Լեհական Polskie Gornictwo Naftowe i Gazownictwo (PGNiG) էներգետիկ ընկերությունը պայմանագիր է կնքել ամերիկյան Venture Global LNG ընկերության հետ Լեհաստանին տարեկան 2 միլիոն տոննա հեղուկ գազ մատակարարելու վերաբերյալ։ Այս մասին լրագրողներին հայտնել են լեհական ընկերության ներկայացուցիչները։
«PGNiG ընկերությունը 20 տարի պետք է հեղուկ գազ ստանա ամերիկյան ընկերությունից այն երկրի ներսում սպառելու կամ վաճառելու համար», - ասվում է լեհական ընկերության տարածած հայտարարության մեջ։ Գազի մատակարարումը պետք է տեղի ունենա free on board բանաձևի հիման վրա։
PGNiG ընկերության ղեկավար Պետր Վոզնյակը հայտարարել է, որ ռուսական բնական գազի՝ Լեհաստան մատակակարման պայմանագիրը 2022 թ․ ուղղակի կավարտվի։ Նրա խոսքով՝ Լեհաստանը պետք է այլընտրանք գտներ, և «ԱՄՆ-ի հետ համագործակցության պայմաններն անհամեմատ լավն են»։
«Մենք դեռ կհայտարարենք մեր նոր ձեռքբերումների մասին։ Մեր գլխավոր չափանիշներն են կայունությունը և մրցունակությունը», - ասել է Վոզնյակը։
Լեհաստանը տարեկան սպառում է 15 միլիարդ խորանարդ մետր գազ, որի մեկ երրորդը ստանում է սեփական երկրի տարածքից, իսկ մնացածը լրացվում է ներկրման միջոցով։ Լեհաստանի գազի գլխավոր մատակարարը ռուսական «Газпром» ընկերությունն է, որն, ըստ երկարաժամկետ պայմանագրի, տարեկան կարող է մատակարարել 10,2 միլիարդ խորանարդ մետր գազ։
2012 թ․ կողմերը համաձայնել են գազի մատակարարման արժեքն իջեցնել 10%-ով։ 2015 թ․ PGNiG ընկերությունը «Գազպրոմ»-ի դեմ հայց է ներկայացրել Ստոկհոլմի արբիտրաժային դատարան գազի գնի իջեցման հարցով։ Վարշավան պնդում է, որ գազի գինը գործող համաձայնագրում բարձրացված է և չի համապատասպանում եվրոպական էներգետիկ շուկայի ստանդարտներին։
Լեհաստանը ստիպված եղավ իր գազի պաշարների պակասը լրացնել այլընտրանքային ներկրումների միջոցով։ Նախորդ տարի Կատարից և ԱՄՆ-ից Լեհաստան է մատակարարվել 13 նավ հեղուկ գազ։
Աղբյուր՝ https://tass.ru/ekonomika/5682898