Պուտինը նշել է, թե որ դեպքում Ռուսաստանը միջուկային զենք կկիրառի
Ռուսաստանը միջուկային զենք կկիրառի միայն այն դեպքում, երբ համոզվի, որ ինչ-որ մեկն իր տարածքի վրա նմանատիպ հարձակում է կատարում։ Այս մասին «Վալդայ» համաժողովի նիստի ժամանակ հայտարարել է ՌԴ նախագահ Վլադիմիր Պուտինը։
«Ագրեսորը պետք է հասկանա, որ պատիժն անխուսափելի է, որ ինքը կոչնչացվի։ Մենք ագրեսիայի զոհեր ենք և, որպես նահատակներ, ընկնելու ենք դրախտ։ Իսկ նրանք պարզապես կմեռնեն և չեն հասցնի անգամ ապաշխարել», - ասել է ՌԴ նախագահը։
Պուտինը հիշեցրել է, որ Ռուսաստանի ռազմական դոկտրինի հայեցակարգում չկա միջուկային հարվածի կանխագելում, և Մոսկվան «չի կարող լինել համաշխարհային այդ աղետի նախաձեռնողը»։
Հոկտեմբերին ՌԴ զինված ուժերն անցկացրել են ռազմավարական միջուկային ուժերի զորավարժություններ, որոնց ներգրավված են եղել ցամաքային զորքերը, նավատորմը և ավիացիան։
Ռուսաստանի ռազմական դոկտրինում նշված է, որ պետությունն իրեն «իրավունք է վերապահում կիրառել միջուկային զենքն այն դեպքում, եթե իր կամ իր դաշնակիցների նկատմամբ կիրառվել է միջուկային կամ զանգվածային ոչնչացման այլ զենք, կամ պետության գոյությունը վտանգի տակ է»։ Միջուկային զենք կիրառելու մասին որոշումը կայացնում է ՌԴ նախագահը։