Մակրոնը և Թրամփը քննարկել են Միջին և ցածր հեռահարության հրթիռների մասին պայմանագրի ճակատագիրը
Ֆրանսիայի նախագահ Էմանուել Մակրոնը և ԱՄՆ նախագահ Դոնալդ Թրամփը հեռախոսազրույցի ընթացքում քննարկել են Միջին և ցածր հեռահարության հրթիռների մասին պայմանագրի ապագան։ Ֆրանսիայի նախագահը նշել է, որ այս պայմանագիրը չափազանց կարևոր է Եվրոպայի անվտանգության և կայունության համար։
«Նախագահ Մակրոնը և ԱՄՆ նախագահ Թրամփը հեռախոսզրույցի ընթացքում քննարկել են Միջին և ցածր հեռահարության մասին պայմանագրի ապագան, մասնավորապես՝ դրա ազդեցությունը Եվրոպայի անվտանգության և ռազմավարական կայունության վրա», - ասվում է Ֆրանսիայի նախագահի մամուլի ծառայության տարածած հաղորդագրության մեջ։
Ավելի վաղ ԱՄՆ նախագահ Դոնալդ Թրամփը հայտարարել էր, որ իրենք չեն պատրաստվում հետևել Միջին և ցածր հեռահարության հրթիռների մասին պայմանագրի դրույթներին և ցանկանում են դուրս գալ դրանից, քանի որ Մոսկվան չի կատարում պայմանագրի պահանջները։
Թրամփը, մեկնաբանելով ՄՑՀՀՊ-ից դուրս գալու որոշումը, նշել է, որ Միացյալ Նահանգները շարունակելու է զարգացնել իր զենքերը։
ՌԴ արտաքին գործերի փոխնախարար Սերգեյ Ռիբկովը հայտարարել է, որ պատրասվում է ՄՑՀՀՊ-ից Վաշինգտոնի դուրս գալու մասին մանրակրկիտ բացատրություններ ստանալ ԱՄՆ նախագահի՝ ազգային անվտանգության հարցերով խորհրդական Ջոն Բոլթոնից, որն առաջիկա կիրակի այցելելու է Մոսկվա։