Բոլթոնը Մոսկվային մեղադրել է Միջին և ցածր հեռահարության հրթիռների մասին պայմանագրի դրույթները խախտելու մեջ
Միացյալ Նահանգները պնդում է, որ Ռուսաստանը խախտում է Միջին և ցածր հեռահարության հրթիռների մասին պայմանագրի դրույթները, և Վաշինգտոնը չի կարող դա տանել՝ չունենալով պատասխանելու հնարավորություն։ Այս մասին հայտարարել է ԱՄՆ նախագահի՝ ազգային անվտանգության հարցերով խորհրդական Ջոն Բոլթոնը։
«Ինչպես ասել է նախագահը, Ռուսաստանն անում է այն, ինչը, մեր կարծիքով, խախտում է պայմանագրի դրույթները, և մենք չենք պատրաստվում դա տանել՝ չունենալով պատասխանելու հնարավորություն», - ասել է Բոլթոնը։
Հիշեցնենք, որ ավելի վաղ ԱՄՆ նախագահ Դոնալդ Թրամփը հայտարարել էր, որ իրենք չեն պատրաստվում հետևել Միջին և ցածր հեռահարության հրթիռների մասին պայմանագրի դրույթներին և ցանկանում են դուրս գալ դրանից, քանի որ Մոսկվան չի կատարում պայմանագրի պահանջները։
Թրամփը, մեկնաբանելով ՄՑՀՀՊ-ից դուրս գալու որոշումը, նշել է, որ Միացյալ Նահանգները շարունակելու է զարգացնել իր զենքերը։
ՌԴ արտաքին գործերի փոխնախարար Սերգեյ Ռիբկովը հայտարարել է, որ պատրասվում է ՄՑՀՀՊ-ից Վաշինգտոնի դուրս գալու մասին մանրակրկիտ բացատրություններ ստանալ ԱՄՆ նախագահի՝ ազգային անվտանգության հարցերով խորհրդական Ջոն Բոլթոնից, որն առաջիկա կիրակի այցելելու է Մոսկվա։