Լրագրող Ջեմալ Խաշոգջիի սպանությունը չէր կարող տեղի ունենալ առանց ԱՄՆ-ի աջակցության․ Ռոհանի

Սաուդցի լրագրող Ջեմալ Խաշոգջիի սպանությունը չէր կարող տեղի ունենալ առանց ԱՄՆ-ի աջակցության։ Այս մասին հայտարարել է Իրանի նախագահ Հասան Ռոհանին։

«Չեմ կարծում, որ որևէ մեկը կարող էր նման հանցագործություն կատարել առանց ԱՄՆ-ի աջակցության։ Ոչ ոք չէր էլ կարող պատկերացնել, որ արդի ժամանակաշրջանում մենք կարող ենք ականատես լինել նման սպանության», - ասել է Ռոհանին՝ կոչ անելով Թուրքիային թափանցիկ և բազմակողմանի քննություն իրականացնել։

«Մենք թուրքական կառավարությանը խնդրում ենք շարունակել հետաքննությունը և միջազգային հանրությանը ներկայացնել այս գործի բոլոր մանրամասները», - շարունակել է Իրանի նախագահը։

Հիշեցնենք, որ լրագրող Ջեմալ Խաշոջին աշխատում էր ամերիկյան The Washington Post թերթում և 2017 թվականից ապրում էր ԱՄՆ-ում։ Նա անհետացել է հոկտեմբերի 2-ին, երբ մտել է Ստամբուլում Սաուդյան Արաբիայի գլխավոր հյուպատոսարանի շենք։

Շուրջ երկու շաբաթ Թուրքիայում սաուդական դիվանագիտական ներկայացուցչությունը պնդում էր, որ լրագրողը հեռացել է շենքից։ Հոկտեմբերի 20-ին Սաուդյան Արաբիայի լրատվականները հրապարակել էին երկրի գլխավոր դատախազի հայտարարությունը, ըստ որի՝ Խաշոջին մահացել է Ստամբուլի գլխավոր հյուպատոսարանում վերջինիս և դիվանագիտական ներկայացուցչության մի քանի աշխատակիցների միջև ծագած վեճի արդյունքում։ Դատախազի խոսքով՝ այդ գործով ձերբակալվել է 18 մարդ, որոնք հարցաքննվել են։

Սաուդյան Արաբիայի արտաքին գործերի նախարար Ադել ալ-Ջուբեյրը, մեկնաբանելով լրագրողի սպանությունը, նշել է, որ հանցագործները չարաշահել են իրենց լիազորությունները։

Սաուդյան Արաբիայի թագավոր Սալման Բին Աբդուլ Ազիզ Ալ-Սաուդը և թագաժառանգ Մուհամմեդ Բին Սալման Ալ-Սաուդը հեռախոսով ցավակցել են սպանված լրագրողի ընտանիքին։