Թուրքիայում Գյուլենական շարժման հետ կապեր ունենալու կասկածանքով ձերբակալության հրաման է արձակվել 30 մարդու նկատմամբ

Անկարայի դատախազությունը հրահանգել է ձերբակալել 30 մարդու, որոնք կասկածվում են 2016 թ․ Թուրքիայում տեղի ունեցած հեղաշրջման փորձին մասնակցություն ունենալու մեջ։ Այս մասին տեղեկացնում է թուրքական Milliyet թերթը։

Աղբյուրի փոխանցմամբ՝ կասկածյալները Թուրքիայի ազգային առողջապահության նախարարության աշխատակիցներ են։ Նրանք բոլորը մեղադրվում են Գյուլենական շարժման հետ առնչություն ունենալու մեջ։ Նշվում է, որ նրանցից 20-ն արդեն հարցաքննվել է։

Ավելի վաղ՝ հոկտեմբերի 24-ին Ստամբուլի դատախազությունը հրահանգել էր ձերբակալել 56 մարդու, որոնք կասկածվում են ByLock բջջային հավելվածն օգտագործելու մեջ։ Թուրք իրավապահները պնդում են, որ հեղաշրջման փորձի կազմակերպիչները միմյանց միջև կապը պահել և իրենց գործողությունները կոորդինացրել են հենց այս հավելվածի միջոցով։

Հիշեցնենք, որ Անկարան 2016 թ․ հուլիսի 15-ին տեղի ունեցած հեղաշրջման փորձի կազմակերպման մեջ մեղադրում է արդի իսլամական գաղափարախոսության հիմնադիր Ֆեթուլլահ Գյուլենին, որը 1999 թվականից բնակվում է ԱՄՆ-ում։

Թուրքիայի նախագահ Ռեջեփ Թայիփ Էրդողանն ԱՄՆ-ի իշխանություններից մի քանի անգամ պահանջել է Գյուլենին ձերբակալել և արտահանձնել Թուրքիային, սակայն մերժում է ստացել։ Ըստ ամերիկյան կողմի՝ Թուրքիայի իշխանությունները չեն տրամադրել հեղաշրջման փորձին Գյուլենի մասնակցության վերաբերյալ բավարար ապացույցներ։