Աֆղանստանի մայրաքաղաքում տեղի ունեցած պայթյունի հետևանքով զոհվել է երկու մարդ

Աֆղանստանի մայրաքաղաք Քաբուլում՝ Անկախ ընտրական հանձնաժողովի գրասենյակի մոտ տեղի ունեցած պայթյունի հետևանքով զոհվել է երկու մարդ, որոնցից մեկը՝ ոստիկան։ Այս մասին տեղեկացնում է TOLONews-ը։

Աղբյուրի փոխանցմամբ՝ ևս հինգ մարդ ստացել է տարբեր աստիճանի մարմնական վնասվածքներ։ Պայթյունը տեղի է ունեցել տեղի ժամանակով 08:15-ի սահմաններում։

Ոստիկանության հաղորդմամբ՝ մահապարտ-ահաբեկիչը պայթուցիկ սարք է գործարկել գրասենյակի մուտքի մոտ։ Բոլոր տուժածները անկախ ընտրական հանձնաժողովի անդամներ են։

Հատկանշական է, որ Աֆղանստանում գործող ահաբեկչական խմբավորումներից ոչ մեկը դեռ չի ստանձնել տեղի ունեցած հարձակման պատասխանատվությունը։