Ֆրանսիայում ԱՄՆ դեսպանը կարող է դառնալ ՄԱԿ-ում ԱՄՆ-ի նոր մշտական ներկայացուցիչը

Դոնալդ Թրամփը ՄԱԿ-ում ԱՄՆ մշտական ներկայացուցչի պաշտոնում դիտարկում է Ֆրանսիայում ԱՄՆ դեսպան Ջեյմի Մաքքորթի թեկնածությունը։ Այս մասին գրում է TASS-ը՝ հղում կատարելով Fox News-ին։

Աղբյուրի փոխանցմամբ՝ չնայած դրան՝ այս պաշտոնին գլխավոր թեկնածուն դեռ մնում է Պետքարտուղարության մամուլի խոսնակ Հեդեր Նաուերթը։ Լրատվականը հայտնում է, որ հոկտեմբերի 29-ին Նաուերթը Սպիտակ տանը հանդիպել է Դոնալդ Թրամփի հետ։ Չի նշվում, սակայն, թե ինչն է եղել նրանց հանդիպման թեման։

Ավելի վաղ Սպիտակ տան ղեկավարը հայտարարել էր, որ ՄԱԿ-ում ԱՄՆ մշտական ներկայացուցչի պաշտոնի համար դիտարկում է հինգ թեկնածություն։

Հիշեցնենք, որ ներկայում ՄԱԿ-ում ԱՄՆ մշտական ներկայացուցիչ Նիկի Հեյլին հրաժարական է ներկայացրել և կլքի զբաղեցրած պաշտոնն առաջիկա հունվարին։

Ջեյմի Մաքքորթը Ֆրանսիայում ԱՄՆ դեսպան է նշանակվել 2017 թ․ նոյեմբերին։