Թուրքիայում Գյուլենական շարժման հետ կապեր ունենալու կասկածանքով ձերբակալության հրաման է արձակվել ավելի քան հարյուր մարդու նկատմամբ

Անկարայի դատախազությունը հրահանգել է ձերբակալել 109 մարդու, որոնք կասկածվում են 2016 թ․ Թուրքիայում տեղի ունեցած հեղաշրջման փորձին մասնակցություն ունենալու մեջ։ Այս մասին տեղեկացնում է Haberturk-ը։

Աղբյուրի փոխանցմամբ՝ 88 մարդ, որոնց թվում կան իրավապահ մարմինների նախկին աշխատակիցներ, կասկածվում են Գյուլենական շարժման հետ առնչություն ունենալու և վերջինիս գաղափարները ոստիկանական համակարգում տարածելու մեջ։ Եվս 21 մարդ կասկածվում է ByLock բջջային հավելվածն օգտագործելու մեջ։ Թուրք իրավապահները պնդում են, որ հեղաշրջման փորձի կազմակերպիչները միմյանց միջև կապը պահել և իրենց գործողությունները կոորդինացրել են հենց այս հավելվածի միջոցով։

Հիշեցնենք, որ Անկարան 2016 թ․ հուլիսի 15-ին տեղի ունեցած հեղաշրջման փորձի կազմակերպման մեջ մեղադրում է արդի իսլամական գաղափարախոսության հիմնադիր Ֆեթուլլահ Գյուլենին, որը 1999 թվականից բնակվում է ԱՄՆ-ում։

Թուրքիայի նախագահ Ռեջեփ Թայիփ Էրդողանն ԱՄՆ-ի իշխանություններից մի քանի անգամ պահանջել է Գյուլենին ձերբակալել և արտահանձնել Թուրքիային, սակայն մերժում է ստացել։ Ըստ ամերիկյան կողմի՝ Թուրքիայի իշխանությունները չեն տրամադրել հեղաշրջման փորձին Գյուլենի մասնակցության վերաբերյալ բավարար ապացույցներ։