Ավստրիայի դեսպանը հրավիրվել է ՌԴ արտաքին գործերի նախարարություն

Մոսկվայում Ավստրիայի դեսպան Յոհաննես Այգները կանչվել է ՌԴ արտաքին գործերի նախարարություն՝ ավստրիական բանակի պաշտոնաթող սպայի՝ Ռուսաստանի օգտին լրտեսություն անելու մասին Վիեննայի հայտարարության վերաբերյալ բացատրություններ տալու։ Այս մասին գրում է ՏԱՍՍ-ը։

«ԱԳՆ է հրավիրվել Մոսկվայում Ավստրիայի դեսպանը», - լրատվականի թղթակցին ասել է ՌԴ արտաքին քաղաքական գերատեսչության ներկայացուցիչը։ Նշվում է, որ նա պետք է ԱԳՆ ներկայանա այսօր՝ նոյեմբերի 9-ին։

Հիշեցնենք, որ Ավստրիայի իրավապահ մարմինները հետաքննություն են սկսել ավստրիական բանակի 70-ամյա պաշտոնաթող գնդապետի նկատմամբ, որն, իբր 1990-ականների վերջերից լրտեսություն է անում Մոսկվայի համար։

Ավստրիայի կանցլեր Սեբաստիան Կուրցը և պաշտպանության նախարար Մարիո Կունասեկը հաստատել են այս տեղեկությունը։ Կուրցն ավելի վաղ հայտարարել էր, որ երկրի արտաքին գործերի նախարար Կարին Կնաիսլը չեղարկել է իր այցը Ռուսաստան և իր մոտ է հրավիրել Վիեննայում ՌԴ դեսպանատան ներկայացուցչին։