Փարիզում տեղի է ունեցել Էմանուել Մակրոնի և Դոնալդ Թրամփի հանդիպումը

Ֆրանսիայի նախագահ Էմանուել Մակրոնը Փարիզում հանդիպում է ունեցել ԱՄՆ նախագահ Դոնալդ Թրամփի հետ։ Այս մասին տեղեկացնում է Reuters գործակալությունը՝ հղում կատարելով Ելիսեյան պալատի աղբյուրին։

Նշվում է, որ հանդիպումը տեղի է ունեցել Դոնալդ Թրամփի թվիթերյան հայտարարությունից հետո, որում ԱՄՆ նախագահը քննադատել է Մակրոնի այն հայտարարությունը, ըստ որի՝ Եվրոպական Միությունը պետք է միասնական բանակ ստեղծի, որպեսզի պաշտպանվի արտաքին վտանգներից, այդ թվում՝ Միացյալ Նահանգներից։

Ելիսեյան պալատի աղբյուրը թվիթերյան հայտարարությունն անվանել է «թյուրիմացություն» և մեջբերել հանդիպման ժամանակ Թրամփի հնչեցրած խոսքերը։ Ֆրանսիայի նախագահի վարչակազմի ներկայացուցչի խոսքով՝ Թրամփն ասել է․ «Ես կարծում եմ՝ մենք ավելի մտերիմ ենք, քան կարող է թվալ»։

Դոնալդ Թրամփն իր կնոջ հետ Փարիզ է ժամանել նոյեմբերի 9-ի երեկոյան՝ մասնակցելու Առաջին համաշխարհային պատերազմի հարյուրամյակին նվիրված միջոցառումներին։ Այս միջոցառումների գլխավոր իրադարձությունը տեղի է ունենալու նոյեմբերի 11-ին Հաղթական կամարի մոտ։ Հանդիսավոր արարողությանը մասնակցելու է շուրջ 60 երկրի ղեկավար, այդ թվում՝ ՀՀ վարչապետի պաշտոնակատար Նիկոլ Փաշինյանը։

Նույն օրը բացվելու է նաև Խաղաղության փարիզյան համաժողովը, որի նպատակն է միջազգային լարվածության թուլացումը։