Փարիզում Թրամփը արդյունավետ հանդիպումներ է ունեցել Պուտինի, Մակրոնի, Մերկելի և այլոց հետ․ Սպիտակ տուն
Փարիզում տեղի ունեցած միջոցառումների ժամանակ, որոնք նվիրված էին Առաջին համաշխարհային պատերազմի ավարտի հարյուրամյակին, ԱՄՆ նախագահ Դոնալդ Թրամփը հանդիպումներ է ունեցել ՌԴ նախագահ Վլադիմիր Պուտինի, Ֆրանսիայի նախագահ Էմանուել Մակրոնի, Գերմանիայի կանցլեր Անգելա Մերկելի և այլ առաջնորդների հետ։ Այս մասին տեղեկացրել է Սպիտակ տան մամուլի ծառայության ղեկավար Սառա Սանդերսը։
Նրա խոսքով՝ հանդիպումների ընթացքում քննարկվել է Միջին և ցածր հեռահարության հրթիռների ոչնչացման մասին պայմանագիրը, միջուկային համաձայնագիրը, Սիրիական հակամարտությունը, Կորեական թերակղզում ստեղծված իրավիճակը, Աֆղանստանը, Սաուդյան Արաբիան, Չինաստանի հետ առևտրային հակամարտությունը և այլն։
«Երկրների ղեկավարները շատ արդյունավետ քննարկումներ են ունեցել», - նշել է Սանդերսը։
Ինչպես գրում է Ռիա Նովոստի-ն, ավելի վաղ ՌԴ նախագահ Վլադիմիր Պուտինը հայտնել էր, որ Փարիզում Թրամփի հետ ունեցած հանդիպումը լավ է անցել։
Հիշեցնենք, որ նախօրեին Ֆրանսիայի մայրաքաղաքն ընդունել էր մի շարք պետությունների և կառավարությունների ղեկավարների, որոնք այստեղ մասնակցել են Առաջին համաշխարհային պատերազմի ավարտի հարյուրամյակին նվիրված միջոցառումներին։
Ելիսեյան պալատում առավոտյան տեղի ունեցած հավաքից հետո երկրների առաջնորդները գնացել է Հաղթական կամարի մոտ, որտեղ տեղի է ունեցել հանդիսավոր արարողություն։
Նոյեմբերի 11-ի երեկոյան մի շարք պետությունների ղեկավարներ մասնակցել են նաև «Փարիզի խաղաղության համաժողովին»։