Հարավային Կորեայի հետախուզությունը պնդում է, որ Փհենյանը շարունակում է զարգացնել իր հրթիռային և միջուկային ծրագրերը
ԿԺԴՀ-ն շարունակում է զարգացնել իր միջուկային և հրթիռային ծրագրերը անգամ իրենց առաջնորդ Կիմ Չեն Ընի և ԱՄՆ նախագահ Դոնալդ Թրամփի հանդիպումից հետո։ Ինչպես տեղեկացնում է Yonhap գործակալությունը, այս մասին հայտնել են Հարավային Կորեայի հետախուզական ծառայության ներկայացուցիչները, որոնք այս մասին զեկույց են ներկայացրել ազգային ժողովում։
«Հրթիռային և միջուկային ոլորտներում հետազոտությունները շարունակվում են նույնիսկ ԿԺԴՀ-ԱՄՆ գագաթնաժողովից հետո», - ասել է հարավկորեացի պատգամավորներից մեկը՝ հավելելով, որ Փհենյանն այժմ զբաղվում է միջուկային մանր մարտագլխիկներ ստեղծելու աշխատանքներով։
Նրա խոսքով՝ Հարավային Կորեայի հատուկ ծառայություններն ուշադրությամբ հետևում են հյուսիսկորեական հրթիռային օբյեկտներին։ Պատգամավորը նշել է նաև, որ Սեուլը և Վաշինգտոնը շարունակում են տվյալներ փոխանակել Հյուսիսային Կորեայի միջուկային և հրթիռային գործունեության վերաբերյալ։
Հիշեցնենք, որ այս տարվա հունիսի 12-ին Սինգապուրում տեղի ունեցած հանդիպման ժամանակ ԿԺԴՀ առաջնորդ Կիմ Չեն Ընը ԱՄՆ նախագահ Դոնալդ Թրամփին հայտնել է Կորեական թերակղզու ամբողջական ապամիջուկայացման իր ծրագրի մասին։