Ավարտվել է Թուրքիայում ՌԴ նախկին դեսպանի սպանության գործի քննությունը
Թուրքիայում ՌԴ նախկին դեսպան Անդրեյ Կարլովի սպանության գործի քննությունն ավարտվել է։ Այս մասին տեղեկացնում է թուրքական Anadolu գործակալությունը։
Նշվում է, որ մեղադրական ակտն արդեն ուղարկվել է դատախազություն։ Դրա հաստատման դեպքում գործը կուղարկվի դատարան։
Հիշեցնենք, որ 2016 թ․ դեկտեմբերի 19-ին Անկարայի Ժամանակակից արվեստների կենտրոնում ցուցահանդեսի ժամանակ սպանվել էր Թուրքիայում Ռուսաստանի դեսպան Անդրեյ Կարլովը։ Մարդասպանը, որը ոչնչացվել էր հատուկ գործողության արդյունքում, 22-ամյա Մևլութ Մերթ Ալթընթաշն էր։ Նա Իզմիրի ոստիկանական դպրոցի շրջանավարտ էր և 2.5 տարի աշխատել էր Անկարայի ոստիկանությունում։
Անդրեյ Կարլովի սպանության գործով ձերբակալվել է 8 մարդ, որոնցից 4-ը՝ ոստիկանության նախկին աշխատակիցներ։ Ձերբակալվածների թվում է եղել նաև այն ցուցահանդեսի կազմակերպիչը, որի ժամանակ էլ տեղի էր ունեցել ռուս դեսպանի սպանությունը։
Թուրքիայի իշխանություններն այս հանցագործության կազմակերպման մեջ մեղադրում են Գյուլենական շարժամը։ Անձամբ Ֆեթուլլահ Գյուլենը կտրականապես հերքում է մեղադրանքները։