ԱՄՆ-ում մեղադրանք են առաջադրել Ջուլիան Ասանժի նկատմամբ․ WP

ԱՄՆ-ում մեղադրանք են առաջադրել Wikileaks-ի հիմնադիր Ջուլիան Ասանժին, որը 2012 թվականից գտնվում է Լոնդոնում Էկվադորի դեսպանատանը։ Այս մասին տեղեկացնում է The Washington Post թերթը, որի տրամադրության տակ են հայտնվել մեղադրանքների մասին փաստաթղթեր։

Աղբյուրի փոխացնամբ ԱՄՆ-ի արդարադատության նախարարությունը չէր պատրաստվում հայտարարել մեղադրանքի մասին, սակայն գլխավոր դատախազի օգնականներից մեկը՝ Քելեն Դուաերը, ակամա գաղտնազերծել է այս տեղեկությունը։

Դատախազի գրասենյակի ներակայացուցիչը հայտարարել է, որ մեղադրանքի մասին տեղեկություններ պարունակող փաստաթղթերում Ասանժի անունը հայտնվել է սխալմամբ։

Ավելի վաղ The Wall Street Journal թերթը գրել էր, որ ԱՄՆ-ի արդարադատության նախարարությունը պատրաստվում է մեղադրանք առաջադրել WikiLeaks-ի հիմնադրի նկատմամբ։

Ջուլիան Ասանժը 2012 թվականից գտնվում է Լոնդոնում Էկվադորի դեսպանատանը, որտեղ իրեն ապաստան են տվել։ Այսպիսով WikiLeaks-ի հիմնադիրը փորձում է խուսափել Շվեդիա արտանահնձնվելուց, որտեղ նրան պետք է ձերբակալեն։ Ասանժը մեղադրվում է սեռական ոտնձգություն կատարելու և բռնաբարության մեջ։ Ասանժի հիմնական մտահոգությունն այն է, որ Շվեդիան կարող է իրեն արտահանձնել ԱՄՆ-ին, որտեղ նրան սպառնում է 35 տարվա ազատազրկում կամ մահապատիժ պետքարտուղարության գաղտնի փաստաթղթերը հրապարակելու համար։ Նա հերքում է իրեն առաջադրված մեղադրանքները՝ դրանք պայմանավորելով քաղաքական դրդապատճառներով։

Այս տարվա մարտին Էկվադորի իշխանությունները նրան զրկեցին հաղորդակցության միջոցներից՝ ինտերնետ հասանելիությունից և հեռախոսային կապից։ Այս որոշումը Կիտոյում հիմնավորեցին նրանով, որ Ասանժը շարունակում էր քաղաքական հայտարարություններ անել։