Սիրիայի հարցով Աստանայում կայանալիք հանդիպմանը քննարկվելու է Իդլիբի շուրջ ստեղծված իրավիճակը․ Ղազախստանի ԱԳՆ
Սիրիական հակամարտության կարգավորման հարցով Աստանայում կայանալիք հանդիպմանը քննարկվելու է Իդլիբում տիրող իրավիճակը և փախստականների վերադարձի համար պայմանների ստեղծման հարցը։
Այս մասին լրագրողների հետ զրույցում հայտնել է Ղազախստանի արտաքին գործերի նախարար Կայրաթ Աբդրահմանովը․ գրում է ՏԱՍՍ-ը։
«Ըստ երաշխավոր երկրներից ստացված տեղեկությունների՝ այս հանդիպմանը քննարկվելու է Իդլիբի նահանգի հետ կապված հարցեր։ Ինչպես դուք գիտեք Իդլիբը այն չորս անվտանգության գոտիներից մեկն է, որոնց մասին համաձայնությունը ձեռք էր բերվել Աստանայի հանդիպումների արդյունքում։ Բացի այդ քննարկվելու է նաև փախստակաների վերադարձի համար պայմաններ ստեղծելու հարցը», - ասել է Աբդրահմանովը։
Հիշեցնենք, որ Սիրիայի հակամարտության կարգավորման հարցով հանդիպումը տեղի է ունենալու նոյեմբերի 28-ին և 29-ին Ղազախստանի մայրաքաղաք Աստանայում։
Հանդիպմանը դիտորդի կարգավիճակով ներկայացված է լինելու նաև ՄԱԿ-ը և Հորդանանը։