Թուրքիայում Գյուլենական շարժման հետ կապեր ունենալու կասկածանքով ձերբակալության հրաման է արձակվել 51 մարդու նկատմամբ

Անկարայի դատախազությունը 2016 թ․ Թուրքիայում տեղի ունեցած պետական հեղաշրջման փորձի հետաքննության շրջանակներում հրահանգել է ձերբակալել 51 մարդու։  Այս մասին տեղեկացնում է CNNTurk-ը՝ նշելով, որ վերոնշյալ անձինք, հավանաբար, առնչություն ունեն Գյուլենական շարժման հետ։

Աղբյուրի փոխանցմամբ՝ կասկածյալների թվում են Թուրքիայի ցամաքային զորքերի 48 զինծառայողներ, որոնցից 5-ը՝ պաշտոնաթող։ Նշվում է, որ ձերբակալության հրաման է արձակվել նաև երեք պետաշխատողների նկատմամբ։

Հիշեցնենք, որ Անկարան 2016 թ․ հուլիսի 15-ին տեղի ունեցած հեղաշրջման փորձի կազմակերպման մեջ մեղադրում է արդի իսլամական գաղափարախոսության հիմնադիր Ֆեթուլլահ Գյուլենին, որը 1999 թվականից բնակվում է ԱՄՆ-ում։

Թուրքիայի նախագահ Ռեջեփ Թայիփ Էրդողանն ԱՄՆ-ի իշխանություններից մի քանի անգամ պահանջել է Գյուլենին ձերբակալել և արտահանձնել Թուրքիային, սակայն մերժում է ստացել։ Ըստ ամերիկյան կողմի՝ Թուրքիայի իշխանությունները չեն տրամադրել հեղաշրջման փորձին Գյուլենի մասնակցության վերաբերյալ բավարար ապացույցներ։