Թրամփը որոշել է պետքարտուղարության մամուլի խոսնակին նշանակել ՄԱԿ-ում ԱՄՆ մշտական ներկայացուցչի պաշտոնին
ԱՄՆ նախագահ Դոնալդ Թրամփը որոշել է պետքարտուղարության մամուլի ծառայության ղեկավար Հեդեր Նաուերթին նշանակել ՄԱԿ-ում ԱՄՆ մշտական ներկայացուցչի պաշտոնում։ Այս մասին գրում է TASS-ը՝ հղում կատարելով Bloomberg գործակալության։
Լրատվականն այս տեղեկությունը հայտնում է՝ հիմնվելով երեք աղբյուրի վրա։ Այլ մանրամասներ չեն հաղորդվում։
Ինչպես ավելի վաղ հայտնել էր Fox News-ը, ԱՄՆ նախագահն իր որոշման մասին պետք է պաշտոնապես հայտարարի դեկտեմբերի 7-ին։
Նոյեմբերի սկզբին Դոնալդ Թրամփը հայտարարել էր, որ ՄԱԿ-ում ԱՄՆ մշտական ներկայացուցչի պաշտոնում թեկնածուի մասին կհայտնի տարվա վերջին։
Ավելի վաղ Սպիտակ տան ղեկավարը հայտարարել էր, որ ՄԱԿ-ում ԱՄՆ մշտական ներկայացուցչի պաշտոնի համար դիտարկում է հինգ թեկնածություն։
Հիշեցնենք, որ ներկայում ՄԱԿ-ում ԱՄՆ մշտական ներկայացուցիչ Նիկի Հեյլին հրաժարական է ներկայացրել և կլքի զբաղեցրած պաշտոնն առաջիկա հունվարին։
Նիկի Հեյլին ՄԱԿ-ում ԱՄՆ մշտական ներկայացուցչի պաշտոնն զբաղեցնում է 2017 թ․ հունվարի 27-ից։ Նախագահ դառնալուց հետո Թրամփը Հեյլիին առաջարկել է զբաղեցնել պետքարտուղարի պաշտոնը, սակայն վերջինս հրաժարվել է՝ նշելով, որ ինքը չափազանց անփորձ է դրա համար, ինչից հետո նրան առաջարկվել է դառնալ ՄԱԿ-ում ԱՄՆ մշտական ներկայացուցիչը։ Հեյլին խնդրել է նաև իրեն դարձնել ԱՄՆ-ի Ազգային անվտանգության խորհրդի անդամ։