Մայք Պոմպեոն քննադատել է ռուսական ինքնաթիռների մատակարարումը Վենեսուելային

ԱՄՆ պետքարտուղար Մայք Պոմպեոն քննադատել է Ռուսաստանի կողմից Ту-160 հրթիռակիրների մատակարարումը Վենեսուելային։ Նրա խոսքով՝ դա պետական միջոցների անիմաստ վատնում է։

Այս մասին Պոմպեոն գրել է իր թվիթերյան էջում։

«Ռուսաստանի կառավարությունը մոլորակի կեսի վրայով ռմբակոծիչներ է ուղարկել Վենեսուելա։ Ռուսաստանի և Վենեսուելայի ժողովուրդները պետք է հասկանան, թե դա ինչ է նշանակում․ երկու կոռումպացված կառավարություն վատնում են պետական միջոցները և ճնշում են ազատությունը և անկախությունը, մինչդեռ իրենց ժողովուրդները տառապում են», - գրել է Պոմպեոն։

Հիշեցնենք, որ ավելի վաղ Ռուսաստանը Վենեսուելա էր ուղարկել Ту-160 տեսակի երկու ռմբակոծիչ, ինչպես նաև ռազմաօդային ուժերի Ан-124 և Ил-62 ինքնաթիռներ։

ՌԴ պաշտպանության նախարարությունը հայտնում է, որ ինքնաթիռները անցել են ավելի քան 10 հազար կիլոմետր, և թռիչքն իրականացվել է համաձայն միջազգային իրավունքի բոլոր նորմերի։

Ту-160-ը գերձայնային ռազմավարական ռմբակոծիչ-հրթիռակիր է՝ թևերի երկրաչափությունը փոփոխելու հնարավորությամբ։ Համարվում է  աշխարհի ամենամեծ, ամենածանր և ամենահզոր մարտական գերձայնային ինքնաթիռներից մեկը։