Թուրքիան պատրաստվում է ռազմածովային նոր բազա ստեղծել Սև ծովում

Թուրքիան Սև ծովի արևելյան ափին սկսել է նոր ռազմածովային բազա ստեղծելու աշխատանքները։ Այս մասին տեղեկացնում է թուրքական Milliyet թերթը։

Աղբյուրի համաձայն՝ նոր ռազմաբազան լինելու է Տրապիզոնից 40 կիլոմետր հեռու գտնվող Սյուրմենե բնակավայրի մոտ։ Ակնկալվում է, որ նոր ռազմաբազայում ծառայելու է 400 զինվոր, և աշխատելու է շուրջ 200 քաղաքացիական անձ։

Milliyet-ը գրում է, որ Թուրքիայի իշխանությունները որոշել են այս քայլին գնալ այն բանից հետո, երբ հայտնի դարձավ, որ Միացյալ Նահանգները որոշել է իր ռազմանավերն ուղարկել Սև ծով Կերչի նեղուցում տեղի ունեցած միջադեպից հետո։

Նշենք, որ ներկայում Թուրքիան ունի ռազմածովային 8 բազա 4 ծովերում։