Դեռ վաղ է եզրակացություններ անել Սիրիայից զորքերը դուրս բերելու մասին ԱՄՆ-ի հայտարարությունների վերաբերյալ․ Իրանի ԱԳ նախարար

Իրանի արտաքին գործերի նախարար Մոհամադ Ջավադ Զարիֆը կարծում է, որ դեռ վաղ է եզրակացություններ անել Սիրիայից զորքերը դուրս բերելու մասին ԱՄՆ-ի հայտարարությունների վերաբերյալ։

«Դեռ վաղ է մանրամասն վերլուծել Սիրիայի նկատմամբ ԱՄՆ-ի ծրագրերը։ Թեհրանը բավարար տեղեկություններ չունի Սիրիայում ԱՄՆ-ի պլանների վերաբերյալ, որպեսզի հստակ իր կարծիքը հայտնի», - ասել է Զարիֆը։

Նա նշել է, որ Թեհրանի կարծիքով՝ Սիրիայում ԱՄՆ-ի ռազմական ներկայությունն ի սկզբանե չի եղել օրինական և չի բխել սիրիացի ժողովրդի շահերից։

«Նրանք երբեք իրական պայքար չեն մղել Իսլամական պետության դեմ։ Նրանց գործողությունները և հայտարարությունները մշտապես կրել են քարոզչական բնույթ», - շարունակել է Իրանի արտաքին քաղաքական գերատեսչության ղեկավարը։

Անդրադառնալով Սիրիայում նոր ռազմական գործողություններ սկսելու Թուրքիայի ծրագրերին՝ Զարիֆը նշել է, որ Անկարան պետք է համագործակցի Դամասկոսի հետ և համաձայնեցնի իր գործողությունները։

Հիշեցնենք, որ դեկտեմբերի 19-ին ԱՄՆ նախագահ Դոնալդ Թրամփը հայտարարել էր Սիրիայում Իսլամական պետության դեմ վերջնական հաղթանակի և ամերիկյան զորքերն արաբարական այս երկրից դուրս բերելու մասին։

Ավելի ուշ Սպիտակ տան մամուլի խոսնակ Սառա Սանդերսը հայտարարել է, որ ԱՄՆ-ն արդեն սկսել է զորքերի դուրսբերումը Սիրիայի տարածքից, սակայն սա և ԻՊ-ի դեմ հաղթանակը չի նշանակում, որ միջազգային կոալիցիան դադարելու է գոյություն ունենալ։

Ամերիկացի պաշտոնյաների տվյալներով՝ պետքարտուղարության աշխատակիցները 24 ժամվա մեջ դուրս են բերվել Սիրիայից, իսկ զորախմբի դուրսբերումը տեղի կունենա 60-ից 100 օրվա ընթացքում։