ԱՄՆ-ում քննարկում են ՄԱԿ-ի կազմից դուրս գալու հարցը
ԱՄՆ Կոնգրես օրինագիծ է մտցվել երկրի անդամակցությունը ՄԱԿ-ին դադարեցնելու վերաբերյալ։ Նման նախաձեռնությամբ է հանդես եկել Ներկայացուցիչների պալատի հանրապետական անդամ, Ալաբամա նահանգի ներկայացուցիչ Մայք Ռոջերսը։ Այս մասին գրում է Russia Today-ը՝ հղում կատարելով Ներկայացուցիչների պալատի մամուլի ծառայությանը։
Նման մի փաստաթուղթ 2017 թ․ արդեն մերժվել էր, սակայն Ռոջերսը պնդում է, որ ՄԱԿ-ն «աղետ է Վաշինգտոնի համար»։ Օրենսդիրի կարծիքով՝ ԱՄՆ-ը պետք է միջոցներ չտրամադրի ՄԱԿ-ի բյուջեին և չմասնակցի խաղաղապահ առաքելություններին։ Նախորդ փաստաթղթում կոչ էր արվում նաև զրկել ՄԱԿ-ին Նյու Յորքի շտաբ-բնակարանից։
Մի շարք քաղաքագետներ կարծում են, որ Վաշինգտոնը դուրս չի գա ՄԱԿ-ից, սակայն հնարավոր դուրս գալը հաճախ կօգտագործի Անվտանգության Խորհրդի վրա ճնշումներ գործադրելու համար։
«Միավորված Ազգերի Կազմակերպությունը աղետ է։ Մեր պետությունը հատկացնում է կազմակերպության բյուջեի ավելի քան 20%-ը։ ՄԱԿ-ը շարունակում է հարձակումները մեր ամենամտերիմ դաշնակցի՝ Իսրայելի վրա», - հայտարարել է Ռոջերսը։
Նույն գործիչը 2017 թ․ քննարկման էր ներկայացրել օրինագիծ «Ամերիկյան ինքնիշխանության վերականգնման» մասին, որի շրջանակներում պետք է դադարեցվեր ԱՄՆ-ի անդամակցությունը ՄԱԿ-ի հետ կապ ունեցող բոլոր ենթակառուցվածքներին և չտրամադրվեր միջոցներ։ Խոսքը, մասնավորապես, ՄԱԿ-ի շրջակա միջավայրի պահպանության ծրագրի և առողջապահության միջազգային կազմապերպության մասին է։
Կոնգրեսականը պահանջում էր նաև խզել Նյու Յորքում ՄԱԿ-ի կենտրոնակայանը տեղակայելու մասին պայմանագիրը, կազմակերպությանն արգելել օգտագործել ամերիկյան պետական օբյեկտները, ինչպես նաև ՄԱԿ-ում հավատարմագրված բոլոր աշխատակիցներին զրկել ԱՄՆ-ի տարածքում դիվանագիտական անձեռնմխելիությունից։
ԱՄՆ նախագահ Դոնալդ Թրամփը բազմիցս քննադատել է ՄԱԿ-ի աշխատանքը։ ՄԱԿ-ի Գլխավոր Ասամբլեայի շրջանակում որպես երկրի ղեկավար ունեցած առաջին ելույթի ժամանակ Թրամփը հայտարարեց, որ կազմակերպությունը «չի օգտագործում իր պոտենցիալը»։
Թրամփի կառավարման ընթացքում Միացյալ Նահանգներն արդեն հասցրել է դուրս գալ մի քանի կազմակերպություններից։ Մասնավորապես՝ 2018 թ․ դեկտեմբերի 31-ին Վաշինգտոնը դուրս է եկել ՅՈւՆԵՍԿՕ-ից՝ պատճառաբանելով, որ կազմակերպությունը բազմաթիվ որոշումներ է ընդունում Իսրայելի դեմ։
Նախորդ տարի Միացյալ Նահանգները հայտարարել է նաև ՄԱԿ-ի մարդու իրավունքների խորհրդից դուրս գալու մասին։