Իրաքցի գիտնականն ԻՊ ահաբեկիչներին օգնել է քիմիական զենք ստեղծել․ WP

Իրաքցի գիտնական Սուլեյման ալ-Աֆարին, որն աշխատում է Իրաքի արդյունաբերության և բնական պաշարների նախարարությունում, օգնել է Իսլամական պետության ահաբեկիչներին ստեղծել քիմիական զենք, երբ վերջիններս 2014 թվականին գրավել էին իր հայրենի քաղաքը՝ Մոսուլը։

Այս մասին գրում է The Washington Post-ը, որը հարցազրույց է ունեցել Իրաքյան Քրդստանում բանտարկված 52-ամյա երկրաբանի հետ։

Նա պատմել է, որ ահաբեկիչներն իրեն առաջարկել են օգնել քիմիական զենք ստեղծել։ Գիտնական խոստովանել է, որ շատ քիչ բան է իմացել այդ մասին, սակայն համաձայնել է  աշխատել ահաբեկիչների համար և 15 ամիս շարունակ հսկել է իպրիտի (մանանեխի գազ) արտադրությունը։ Նա դժվարացել է պատասխանել այն հարցին, թե արդյոք զղջում է իր արածի համար։ Այժմ գիտնականը սպասում է իր մահապատժի կատարմանը։

«Նրանք (ահաբեկիչները) դարձան իշխանություն, և մենք սկսեցինք աշխատել նրանց համար։ Մենք աշխատում էինք, որպեսզի վարձատվենք։ Նրանք ոչ ոքի չեն ստիպել», - այսպես է գիտնականը բացատրել իր ընտրությունը։

The Washington Post-ի փոխանցմամբ՝ տվյալ քիմիական զենքի կիրառման հետևանքով հարյուրավոր մարդիկ են զոհվել։

«Չնայած՝ Իրաքում ոչնչացվել են ԻՊ-ի քիմիական զենքի լաբորատորիաները, այնուամենայնիվ, ահաբեկիչները կարողացել են որոշ քիմիական նյութեր իրենց հետ տանել և թաքցնել Սիրիայում», - գրում է WP-ը։