Շոյգուն հրահանգել է մինչև 2020 թ․ ստեղծել «Կալիբր» համակարգի ցամաքային տարբերակը

«Կալիբր» տեսակի ծովային տեղակայման համակարգի բարձր հեռահարության թևավոր հրթիռի ցամաքային տարբերակը պետք է մշակել 2019-2020 թ․թ․ ընթացքում, միևնույն ժամանակ պետք է ստեղծվի բարձր հեռահարության հիպերձայնային հրթիռային համակարգ։ Այս մասին հայտարարել է ՌԴ պաշտպանության նախարար Սերգեյ Շոյգուն։

«Գլխավոր շտաբը Գերագույն գլխավոր հրամանատարին է ներկայացրել միջոցառումների ցանկը, որը հաստատվել է։ 2019-2020 թ․թ․ ընթացքում մենք պետք է մշակենք ծովային տեղակայման «Կալիբր» տեսակի թևավոր հրթիռային համակարգի ցամաքային տարբերակը, որն իրեն լավ դրսևորեց Սիրիայում։ Միևնույն ժամանակ պետք է ստեղծվի բարձր հեռահարության հիպերձայնային հրթիռային համակարգ», - հայտարարել է Շոյգուն։

Նշվում է, որ այս միջոցառումները կապված են այն հանգամանքի հետ, որ փետրվարի 2-ին ԱՄՆ-ն դադարեցրել է Միջին և ցածր հեռահարության հրթիռների ոչնչացման մասին պայմանագրին իր պարտավորությունների կատարումը։

«Այս ընթացքում ամերիկյան կողմը զարգացնում է հրթիռային համակարգեր, որոնք արգելված էին այդ փաստաթղթով։ Այս կապակցությամբ՝ նախագահը պաշտպանության նախարարությանը հրահանգել է պատասխան միջոցներ ձեռնարկել», - շարունակել է ՌԴ պաշտպանության նախարարը։

Նրա խոսքով՝ անհրաժեշտ է ավելացնել այսօր գոյություն ունեցող ցամաքային տեղակայման հրթիռային համակարգերի հեռահարության աստիճանը։

Շոյգուն պաշտպանության փոխնախարար Ալեքսեյ Կրիվորչուկին հրահանգել է կարճ ժամկետներում սկսել զարգացման համապատասխան աշխատանքները։