Քաբուլը բողոք է ներկայացրել ՄԱԿ՝ կապված «Թալիբան» շարժման ներկայացուցիչների՝ Ռուսաստան այցելելու հետ
Աֆղանստանի կառավարությունը բողոք է ներկայացրել ՄԱԿ՝ կապված «Թալիբան» շարժման ներկայացուցիչների Ռուսաստան այցելելու հետ։ Այս մասին գրում է Ria Novosti-ն՝ հղում կատարելով Tolo News-ին։
Աղբյուրի փոխանցմամբ՝ ՄԱԿ-ում Աֆղանստանի մշտական ներկայացուցչի տեղակալ Նազիֆուլա Սալարզայը հաստատել է այս տեղեկությունը։
Ավելի վաղ Աֆղանստանի հարցով Մոսկվայում տեղի ունեցած հանդիպման մասնակիցները կոչ էին անում, որ թալիբների առաջնորդները դուրս բերվեն ՄԱԿ-ի սև ցուցակից, որպեսզի խաղաղ գործընթացն ավելի արդյունավետ ընթանա։
Երկրում իրավիճակի կարգավորման վերաբերյալ Աֆղանստանի քաղաքական գործիչների կոնֆերանսը տեղի է ունեցել փետրվարի 5-6-ին։ Կոնֆերանսին մասնակցել են «Թալիբան» շարժման ներկայացուցիչներ, աֆղան քաղաքական և հասարակական գործիչներ, որոնց գլխավորել է Աֆղանստանի նախկին նախագահ Համիդ Կարզայը։
ՌԴ արտաքին գործերի նախարարությունը, մեկնաբանելով տարածված տեղեկությունները, հայտարարել է, որ վերոնշյալ կոնֆերանսը հրավիրվել է բացառապես աֆղանական սփյուռքի կողմից և չի հանդիսանում Աֆղանստանի հակամարտության կարգավորման մոսկովյան գործընթացի շարունակություն։