Ռուսաստանը 38 միլիոն եվրո կհատկացնի Կուբային ռազմամթերք գնելու համար
Ռուսաստանը Կուբային 38 միլիոն եվրոյի վարկ է տրամադրել, որը պետք է ծախսվի զինամթերքի գնման համար։ Այս մասին հայտարարել է Ռուսաստանի Ռազմատեխնիկական համագործակցության ծառայության ղեկավար Դմիտրի Շուգաևը։
«Վարկային համաձայնագիրն արդեն ստորագրվել է, և արդեն ընթացքի մեջ են Ռուսաստանի հետ միջպետական գործընթացները», - հայտարարել է Շուգաևը։
Նրա խոսքով՝ Կուբայի հետ ներկայիս համաձայնագիրը գործում է դեռ 2006 թվականից։ Դրա շրջանակներում Ռուսաստանն արդեն տրամադրել է մեծ քանակի զինտեխնիկա, այդ թվում՝ ինքնաթիռներ, հրետանային համակարգեր, ինչպես նաև հակաօդային պաշտպանության միջոցներ։
«Նման համագործակցությունը կրում է ռազմավարական բնույթ։ Այն Կուբային հնարավորություն է տալիս երկարաժամկետ հեռանկարում զարգացնել իր ռազմաարդյունաբերական համալիրները։ Այս գումարները գնալու են տեխնիկական համագործակցության զարգացման վրա», - հայտարարել է Շուգաևը։
Նախորդ տարվա նոյեմբերին պարզ էր դարձել, որ Ռուսաստանը պատրաստվում է շուրջ երկու միլիարդ դոլար հատկացնել Կուբայի երկաթուղային ցանցը արդիականացնելու համար։ Բացի այդ, կողմերը մինչև 2030 թվականը համագործակցելու են նաև էներգետիկայի ոլորտում։