Պեկինը Վաշինգտոնին կոչ է անում զերծ մնալ սադրանքներից Հարավչինական ծովում
Միացյալ Նահանգները պետք է դադարեցնի սադրանքները Հարավչինական ծովում, հակառակ պարագայում Չինաստանի զինված ուժերը ստիպված կլինեն պատասխան գործողություններ ձեռնարկել։ Այս մասին ասվում է Չինաստանի պաշտպանության նախարարության հայտարարության մեջ։
«Մենք պնդում ենք, որ ամերիկյան կողմը դադարեցնի սադրանքները․ Չինաստանի հարավային շրջանների զինված ուժերն ուշադրությամբ հետևում են իրավիճակին և անհրաժեշտության դեպքում կձեռնարկեն անհրաժեշտ բոլոր միջոցները պաշտպանելու Չինաստանի ազգային անվտանգությունը և ինքնիշխանությունը», - ասվում է հայտարարության մեջ։
Ավելի վաղ Reuters գործակալությունը հայտնել էր, որ ԱՄՆ ռազմածովային ուժերի երկու հրթիռակիր նավ մտել է Հարավչինական ծովի կղզիներից մեկի ջրային տարածք, որը Պեկինը համարում է իրենը։ Աղբուրի փոխանցմամբ՝ նավարկությունը տեղի է ունեցել «նավարկությունների ազատությանն ուղղված ամերիկյան գործողության շրջանակներում»։
Միացյալ Նահանգները մեկ անգամ չէ, որ իր նավերն ուղարկել է այս շրջաններ՝ ցույց տալով, որ չի ընդունում Պեկինի իրավունքներն այդ ջրային տարածքների վրա։
Վաշինգտոնը Չինաստանին քննադատում է նաև այն բանի համար, որ վերջինս «ամրապնդում և ընդարձակում է Հարավչինական ծովում իր վերահսկողության տակ գտնվող կղզիներն ու տարածքները՝ այնտեղ հաստատելով ռազմական ներկայություն»։ Գործնականում, Պեկինն այս բոլոր ջրային տարածքները համարում է իրենը։