ԱՄՆ-ի պետական պարտքը հասել է ռեկորդային բարձր ցուցանիշի

ԱՄՆ-ի պետական պարտքը պատմության մեջ առաջին անգամ հատել է 22 տրիլիոն դոլարի սահմանը։ Այս մասին տեղեկացնում է ԱՄՆ-ի ֆինանսների նախարարությունը։

Այսպիսով, ֆինանսների նախարարության տվյալների համաձայն՝ Միացյալ Նահանգների պետական պարտքը կազմում է 22,012 տրիլիոն դոլար, ընդ որում՝ 2019 թ․ փետրվարից այս ցուցանիշն ավելացել է 90 միլիարդ դոլարով։

Հատկանշական է նաև, որ վերջին 11 ամսվա ընթացքում պետական պարտքն աճել է մեկ տրիլիոն դոլարով։

Ինչպես հաղորդում է USA Today-ը, Դոնալդ Թրամփի նախագահության օրոք պետական պարտքն աճում է ամենաբարձր տեմպով հատկապես վերջին հարկային բարեփոխումներից հետո, որն ԱՄՆ-ի բյուջեի վրա նստել է 1,5 տրիլիոն դոլար։

Ավելի վաղ հաղորդվում էր, որ 2018 թ․ ֆինանսական տարում ԱՄՆ բյուջեի դեֆիցիտն աճել է 17%-ով և հասել է 779 միլիարդ դոլարի։ Ակնկալվում է, որ 2020 թ․ այն կհասնի մինչև մեկ տրիլիոնի, իսկ պետական պարտքի աճի տեմպը կպահպանվի, քանի որ կառավարության ծախսերը ոչ մի կերպ չեն վերահսկվում։