Չինաստանը բանակցություններ է սկսել Վենեսուելայի ընդդիմության հետ
Չինաստանն սկսել է կապ հաստատել Վենեսուելայի ընդդիմության հետ։ Այս մասին գրում է Lenta-ն՝ հղում կատարելով The Wall Street Journal թերթին։
Աղբյուրի փոխանցմամբ՝ Պեկինն անհանգստացած է Բոլիվարյան Հանրապետությունում իր ներդրումներով և այստեղ է ուղարկել իր դիվանագետներին ընդդիմության ճամբարում Խուան Գուաիդոյի հետ քննարկելու ստեղծված իրավիճակը։ Լրատվականը նշում է, որ Չինաստանը Վենեսուելայի տնտեսությունում մոտ 20 միլիարդ դոլարի ներդրում է արել։
Փորձագետները նշում են, որ Չինաստանը գնահատում է իշխանափոխության ռիսկերը և չի ցանկանում մնալ «վատ կողմում» Կարակասի նոր իշխանությունների համար։
«Չնայած Պեկինում խոսում են կայունության մասին, սակայն հասկանում են, որ եկել է ձվերը տարբեր զամբյուղներում դնելու ժամանակը», - գրում է թերթը։
Հատկանշական է, որ Չինաստանի արտաքին գործերի նախարարությունը չի արձագանքել այս տեղեկություններին։
Փետրվարի 1-ին Գուաիդոն հայտարարել էր, որ իշխանափոխությունը ավելի ձեռնտու կլինի Չինաստանի և Ռուսաստանի համար, որոնք Վենեսուելայի խոշորագույն վարկատուներն են։ Նրա խոսքով՝ Նիկոլաս Մադուրոն ի վիճակի չէ պաշտպանել որևէ մեկի շահերը և այդ պատճառով էլ չի կարող հարմար լինել Մոսկվայի և Պեկինի համար։
Հունվարի 25-ին Ռուսաստանի հրաժարվել էր Գուաիդոյին ճանաչել որպես Վենեսուելայի նախագահ։ Չինաստանը մասամբ համաձայնել էր Մոսկվայի դիրքորոշմանը՝ ՄԱԿ-ի Անվտանգության խորհրդում դեմ քվեարկելով ընդդիմությանն աջակցելու մասին ԱՄՆ-ի առաջարկին։