Բելգիայի հակահետախուզական ծառայության ղեկավարը մեղադրվում է Ռուսաստանի օգտին լրտեսություն անելու մեջ

Բելգիայի ռազմական հակահետախուզական ծառայության ղեկավար Կլեմենտ Վանդերբորը ժամանակավորապես հեռացվել է աշխատանքից գաղտնիության սկզբունքը խախտելու և Ռուսաստանի օգտին աշխատելու կասկածանքով։ Այս մասին գրել է De Morgen թերթը՝ հղում կատարելով իրավիճակին ծանոթ աղբյուրին։

Աղբյուրի փոխանցմամբ՝ այս սկանդալն իրականում կապված է իշխանության համար պայքարի և բելգիական հետախուզության երկու կառույցների՝ քաղաքացիական և ռազմական հետախուզությունների պաշտոնյաների միջև պայքարի հետ։

Թերթի փոխանցմամբ՝ Վանդենբորը զրկվել է գաղտնի փաստաթղթերին հասանելիությունից, և, չնայած, դեռ գտնվում է ազատության մեջ, նրա տեղաշարժը և գործողությունները հսկվելու են մինչև հետաքննության ավարտը։ Նա, անձամբ, կտրականապես հերքում է իրեն առաջադրվող մեղադրանքները։

Լրատվականը գրում է, որ Վանդենբորի՝ գաղտնիության սկզբունքը խախտելու մեղադրանքը կապված է այն բանի հետ, որ նա թուղթ կտրատող սարքով ոչնչացրել է ինչ-որ գաղտնի փաստաթղթեր՝ չպահպանելով արարողակարգային դրույթները։ Ռուսաստանի օգտին լրտեսություն անելու վերաբերյալ մեղադրանքի մասին որևէ մանրամասնություն չի ներկայացվում։

Կլեմենտ Վանդերբորը հետախուզական ծառայություններում աշխատում է արդեն 40 տարի։