Ամերիկյան ռազմանավը մտել է Օդեսայի նավահանգիստ

Ամերիկյան USS Donald Cook հրթիռակիր նավը մտել է Օդեսայի ծովային առևտրի նավահանգիստ։ Այս մասին գրում է Ria Novovsti-ն՝ հղում կատարելով Dumskaya թերթին։

Աղբյուրի փոխանցմամբ՝ ամերիկյան նավն այստեղ կմնա մինչև փետրվարի 27-ը։

Նշվում է, որ հրթիռակիր նավը սևծովյան տարածաշրջանում է դեռ փետրվարի 19-ից։ ԱՄՆ ռազմածովային ուժերի 6-րդ նավատորմի հրամանատարությունից տեղեկացնում են, որ Donald Cook-ն այստեղ իրականացնում է «ծովային անվտանգության ապահովվման գործողություններ»։

Հատկանշական է, որ ամերիկյան ռազմանավն արդեն հասցրել է զորավարժություններ անցկացնել թուրքական ռազմածովային ուժերի TCG Faith հածանավի հետ։ Նշվում է, որ նման մի զորավարժություն էլ նախատեսվում է անցկացնել ուկրաինական ռազմանավերի հետ։

Ria Novosti-ն հիշեցնում է, որ սա ընթացիկ տարվա ընթացքում ամերիկյան ռազմանավի արդեն երկրորդ մուտքն է Սև ծով։ Հունվարի վերջին Donald Cook-ը հինգ օրով հանգրվանել էր Բաթումի նավահանգստում։

Լրատվականն ընդգծում է, որ ռուսական նավերը վերահսկում են ամերիկյան ռազմանավի գործողությունները։