Սաուդյան Արաբիայի թագավորը խոսել է «1937 թ․ սահմաններով միասնական Պաղեստինի» մասին
Սաուդյան Արաբիայի թագավոր Սալման Բեն Աբդուլ Ազիզ ալ Սաուդը խոսել է 1937 թ․ եղած սահմաններով Պաղեստինի մասին և իրարանցում առաջացրել։ Այս մասին, ինչպես հայտնում է թուրքական Anadolu լրատվական գործակալությունը, Սաուդյան Արաբիայի թագավորը խոսել է Եվրոպական Միության և Արաբական պետությունների լիգայի բարձր մակարդակի գագաթնաժողովի ժամանակ։
Աղբյուրի փոխանցմամ, երբ միապետը խոսել է Պաղեստինի հարցի վերաբերյալ Սաուդյան Արաբիայի դիրքորոշման մասին, նա օգտագործել է «1937 թ․ սահմաններով» արտահայտությունը։ Սա, ինչպես նշում է լրատվականը, հակասում է ընդհանուր ընդունված ձևակերպումներին։
«Հաստատում ենք պաղեստինցի ժողովրդի բոլոր օրինական իրավունքները վերականգնող անփոփոխ քաղաքականությունը, որի նպատակն է ստեղծել անկախ Պաղեստինի պետություն 1937 թ․ սահմաններով և Արևելյան Երուսաղեմ մայրաքաղաքով», - ասել է Աբդուլազիզ ալ Սաուդը։
Նշվում է, որ միապետն այս ձևակերպումները կարդացել է թղթից։ Սաուդյան Արաբիայից դեռ որևէ մեկնաբանություն չի հնչել այս կապակցությամբ։