Մայք Պոմպեոն նույնպես ժամանեց Վիետնամ

Այսօր՝ փետրվարի 26-ին, ԱՄՆ պետքարտուղար Մայք Պոմպեոն ժամանել է Վիետնամի մայրաքաղաք Հանոյ, որտեղ տեղի է ունենալու Դոնալդ Թրամփի և Կիմ Չեն Ընի հանդիպումը։ Այս մասին տեղեկացնում է Reuters գործակալությունը։

Նշվում է, որ այստեղ արդեն ավարտվում են ԱՄՆ-ի և Հյուսիսայի Կորեայի առաջնորդների գագաթնաժողովի նախապատրաստական աշխատանքները։

Ավելի վաղ հայտնի էր դարձել, որ Կիմ Չեն Ընը ժամանել է Հանոյ և հանգրվանել քաղաքի կենտրոնում գտնվող Melia Hanoi հյուրանոցի նախագահական համարում։

Հիշեցնենք, որ նախորդ տարվա հունիսի 12-ին Սինգապուրում տեղի ունեցած հանդիպման ժամանակ Կիմ Չեն Ընը և Դոնալդ Թրամփը պայմանավորվել էին, որ ԿԺԴՀ-ը դադարեցնելու է միջուկային և հրթիռային փորձարկումները երկու երկրների միջև հարաբերությունների կարգավորման դիմաց։

Ակնկալվում է, որ երկրորդ գագաթնաժողովի արդյունքում Միացյալ Նահանգները և Հյուսիսային Կորեան կկարողանան ավելի կոնկրետ քայլեր ձեռնարկել և որոշակի պայմանավորվածություններ ձեռք բերել Կորեական թերակղզում իրավիճակը կարգավորելու համար։