Վաշինգտոնն աջակցում է Հնդկաստանին Քաշմիր նահանգում ահաբեկիչների դիրքերը գրոհելու հարցում․ Պոմպեո

ԱՄՆ պետքարտուղար Մայք Պոմպեոն հեռախոսազրույց է ունեցել Հնդկաստանի վարչապետի՝ ազգային անվտանգության հարցերով խորհրդական Աջիդ Դովալի հետ և հայտարարել, որ Վաշինգտոնն աջակցում է Դելիին «Ջեյշ է Մոհամմադ» զինված խմբավորման դեմ գործողություններ իրականացնելու հարցում։ Այս մասին տեղեկացնում է Asian News International-ը՝ հղում կատարելով հնդկական վարչակազմում իր աղբյուրներին։

Նշվում է, որ հեռախոսային խոսակցությունը տեղի է ունեցել փետրվարի 27-ի երեկոյան։ Ավելի վաղ ԱՄՆ պաշտպանության նախարարի ժամանակավոր պաշտոնակատար Պատրիկ Շանահանը Պակիստանին և Հնդկաստանին կոչ էր արել ջանքեր գործադրել ռազմական գործողություներից խուսափելու համար։

Հիշեցնենք, որ փետրվարի 26-ին Հնդկաստանը հայտարարել էր «Ջեյշ է Մոհամմադ» խմբավորման ճամբարին ավիահարված հասցնելու մասին, որը գտնվում է Քաշմիր նահանգնի՝ Պակիստանի վերահսկողության տակ գտնվող տարածքում։

Արդեն փետրվարի 27-ին Պակիստանի ռազմաօդային ուժերը հայտարարեցին, որ օդային հարվածներ են հասցրել Ջամու և Քաշմիր նահանգի՝ Հնդկաստանի տիրապետության տակ գտնվող տարածքներին։

Դելին և Իսլամաբադը նաև հայտարարեցին, որ խոցել են միմյանց կործանիչներ։

Ջամմու և Քաշմիր նահանգը Հնդկաստանի միակ նահանգն է, որտեղ բնակչության մեծ մասը մուսուլմաններ են։ Այստեղ իրավիճակը լարված է բավական երկար ժամանակ։ Այն կռվան է երկու պետությունների միջև դեռ 1947 թվականից, երբ Բրիտանական Հնդկաստանը, ստանալով անկախություն, կրոնական հիմքով բաժանվեց երկու մասի։ Ներկայում Քաշմիրում չկա հստակ սահման։ Այն բաժանված է «վերահսկողության գծով»։

Նահանգի հնդկական մասում ակտիվորեն գործում են խմբավորումներ, որոնք կողմ են Հնդկաստանից անկախանալուն։ Դելին մշտապես մեղադրում է Իսլամաբադին ահաբեկիչների աջակցելու մեջ։