Ամերիկյան ռազմական ինքնաթիռը դիտորդական թռիչք է իրականացրել Սիրիայում ռուսական ռազմաբազայի մոտակայքում
Ամերիկյան ռազմական ինքնաթիռը հետախուզական թռիչք է իրականացրել Սիրիայում ռուսական Հմեյմիմ ավիաբազայի և Տարտուսի նավահանգստում գտնվող ռազմածովային ուժերի բազայի մոտակայքում։ Այս մասին գրում է Ria Novosti-ն՝ հղում կատարելով PlaneRadar-ին։
Նշվում է, որ 168857 բորտի համարով ամերիկյան P-8A Poseidon ինքնաթիռն օդ է բարձրացել ՆԱՏՕ-ի՝ Սիցիլիայում գտնվող Սիգոնելա ավիաբազայից։ Արդեն 16։10-ի սահմաններում օդանավը նկատվել է սիրիական Լաթաքիայի և Լիբանանի ափերի մոտ։ Թռիչքը կատարվել է 6,6 կիլոմետր բարձրության վրա, իսկ օդանավի արագությունը կազմել է 732 կմ/ժ։ Ինքնաթիռը մի քանի անգամ պտտվել է տվյալ տարածքում։
Արտասահմանյան հետախուզական ինքնաթիռները վերջերս սկսել են հաճախակի նկատվել ռուսական սահմանների և արտասահմանում ռուսական ռազմական օբյեկտների մոտակայքում։ Մասնագետները, հատկապես, առանձնացնում են ամերիկյան հետախույզ-ինքնաթիռների ակտիվությունը։
Միայն ընթացիկ տարում ռուսական համապատասխան ռադիոտեխնիկական միջոցները կարողացել են ֆիքսել ավելի քան 980 հազար թռչող սարքերի և ինքնաթիռների թռիչքներ։
ՌԴ պաշտպանության նախարարությունը բազմիցս կոչ է արել ամերիկյան կողմին զերծ մնալ նման գործողություններից։ Պենտագոնը պատասխանել է մերժումով։