Գերմանիայի արտգործնախարարը դեմ է Ռուսաստանի նկատմամբ նոր պատժամիջոցներ կիրառելուն
Գերմանիայի Արտաքին գործերի նախարար Վալտեր Շտայնմայերը անհրաժեշտ չի համարում Սիրիայում Մոսկվայի վարած քաղաքականության պատճառով Ռուսաստանի նկատմամբ տնտեսական նոր պատժամիջոցների կիրառումը։ Այս մասին հայտնում է ռուսական RIA Novosti լրատվական գործակալությունը՝ հղում անելով գերմանական ԶԼՄ-ներին։
Աղբյուրի համաձայն՝ Շտայնմայերն այսիպիսի կարծիք է հայտնել Գերմանիայի Բունդեսթագում նախորդ շաբաթ կայացած միջազգային հարցերով խորհրդակցության ժամանակ։ Գերմանիայի արտաքին գերատեսչության ղեկավարի խոսքով՝ այդպիսի քայլը դժվար թե ազդի Սիրիայի հարցում Ռուսաստանի դիրքորոշման վրա։
Նշենք, որ հոկտեմբերի 5-ին Բունդեսթագի պատգամավորներից մեկը հայտարարել էր, որ Գերմանիայի կառավարությունն արդեն քննարկում է Ռուսաստանի նկատմամբ նոր պատժամիջոցներ սահմանելու հարցը, սակայն դեռևս հայտնի չէ, թե ինչ աջակցություն այն կստանա գերմանական խորհրդարանում։ Հատկանշական է, որ ավելի վաղ նույն հարցը քննարկվել է նաև Սպիտակ տանը։
Photo: osce.org