Պեսկովը բացառել է Սիրիայի խաղաղ բնակչության դեմ հարձակումներին ռուս զինվորականների մասնակցությունը
Ռուսաստանի Դաշնության նախագահի մամլո քարտուղար Դմիտրի Պեսկովը BBC հեռուստաընկերությանը տված հարցազրույցում ասել է, որ բացառում է ռուս զինվորականների մասնակցությունը Սիրիայի խաղաղ բնակչության դեմ հարձակումներին: Այս մասին հայտնում է ռուսական ТАСС լրատվական գործակալությունը:
«Ես բացառում եմ ռուս զինվորականների որևէ մասնակցություն Սիրիայի խաղաղ բնակչության դեմ հարձակումներին, դա անհնար է: Ռուս զինվորականները դեռևս կատարում են իրենց առջև դրված պարտականությունները, պայքարում են ահաբեկչական խմբավորումների, կոնկրետ այդ տարածքում (նկատի ունի Հալեպը – խմբ.)՝ «Ջաբաթ ալ Նուսրայի» դեմ»,- ասել է Պեսկովը: Նրա խոսքով՝ իրենք հումանիտար միջանցք են ստեղծել Հալեպի բնակիչների համար, որպեսզի վերջիններս կարողանան փախչել ահաբեկիչների հսկողության տակ գտնվող տարածքներից:
Հիշեցնենք, որ սեպտեմբերի 25-ին Մեծ Բրիտանիայի, ԱՄՆ-ի և Ֆրանսիայի նախաձեռնությամբ կայացել է ՄԱԿ-ի Անվտանգության խորհրդի արտահերթ նիստ, որտեղ քննարկվել է Սիրիայի Հալեպ քաղաքում տիրող արտակարգ իրավիճակը: Նիստի ընթացքում արևմուտքի երկրները փորձել են իրավիճակի սրման մեջ մեղադրել Ռուսաստանին, իսկ սիրիացի դիվանագետի ելույթի ժամանակ ԱՄՆ-ի, Մեծ Բրիտանիայի և Ֆրանսիայի ներկայացուցիչները դեմոնստրատիվ կերպով լքել են դահլիճը:
Фото: РИА Новости