Վանում հնագետները հայտնաբերել են 2800 տարվա վաղեմություն ունեցող քաղաքային կոյուղի
Ներկայիս Թուրքիայի Վան նահանգի Չավուշթեփե ամրոցի շրջանում հնագետները հայտնաբերել են ուրարտական շրջանի քաղաքային կոյուղի: Հնագետներն ամբողջությամբ ուսումնասիրել են մոտ 2800 տարի առաջ ստեղծված ստորգետնյա ջրահեռացման խողովակների ցանցը: Այս մասին հայտնում է ռուսական ТАСС լրատվական գործակալությունը՝ հղում անելով թուրքական Hurriyet պարբերականին:
Հնագետների ուսումնասիրությունների համաձայն՝ խողովակների տրամագիծը հասնում է մեկ մետրի: Դրանք պատրաստվել են իրար ամրացված քարերից և անցել են քաղաքի տակով՝ որոշակի խորության վրա:
«Մենք գործ ունենք ինժեներական հրաշքի հետ», - ասել է հնագետների խմբի ղեկավարը. այնուհետև ավելացրել է, - «Ուրարտուի բնակիչների մանրակրկիտ մտածել են՝ որտեղ ինչ կառուցել: Նրանք շատ քաղաքակիրթ են եղել և իրենց պալատները կառուցել են ջրահեռացման այնպիսի համակարգերով, որ կարելի է անգամ համեմատել այսօրվա համակարգերի հետ»:
Չավուշթեփե ամրոցը գտնվում է Գյունփընար քաղաքից (գտնվում է Վանի նահանգում) 25կմ հեռավորության վրա: Ամրոցն ունի երկու մասնաշենք՝ վերին և ստորին, և երկուսն էլ կառուցվել է ուրարտական թագավոր Սարդուրի 2-րդի (մ.թ.ա. 764-735թ.թ.) կողմից:
Ուրարտական կամ Վանի թագավորությունը գոյություն է ունեցել Հայկական լեռնաշխարհում՝ մ.թ.ա. 9-6-րդ դարերում: Թագավորների թողած արձանագրություններում երկիրը կոչվում է «Բիայնիլի», «Նաիրի», իսկ Աստվածաշնչում՝ «Արարատյան թագավորություն»:
Photo: arkeolojihaber.net