ԱՄՆ-ի ոստիկանությունը հրապարակել է Օրլանդոյի զինված հարձակումից առաջ զինյալ մարդասպանի հետ հեռախոսազրույցի սղագրությունը

            Օմար Մաթինը, ով այս տարվա հունիսին ամերիկյան Օրլանդո քաղաքի գիշերային ակումբներից մեկում 49 մարդ էր սպանել, դեպքից առաջ զանգահարել է 911 և հավատարմության երդում տվել Իսլամական պետություն ահաբեչական խմբավորմանը: Նա նաև ասել է, որ ԱՄՆ-ը պետք է դադարեցնի ռմբակոծել Սիրիան և Իրաքը: Այս մասին հայտնում է ամերիայն CNN լրատվականը՝ հղում անելով ոստիկանության տարածած հաղորդագրությանը:

            ԱՄՆ Հետաքննությունների դաշնային բյուրոն (FBI) հրապարակել է մարդասպանի և ոստիկանության աշխատակցի հեռախոսազրույցի սղագրված տարբերակը, որտեղ Մաթինը ներկայացել է որպես ԻՊ-ի զինվոր: Մարդասպանի հետ բանակցող ոստիկանը խոսակցության ժամանակ փորձել է համոզել Մաթինին առճակատման չգնալ իրավապահների հետ և հանձնվել վերջիններիս: Ի պատասխան բանակցող ոստիկանի կոչին՝ մարդասպանն ասել է, որ իր արարքի շարժառիթը Սիրիայի և Իրաքի ռմբակոծությունն է ԱՄՆ-ի կողմից, ինչի արդյունքում սպանվել է իրենց առաջնորդներից Աբու Վահիբը:

            Իրավապահների տվյալներով՝ հեռախոսազրույցից մոտ մեկուկես ժամ անց ոստիկանության հատուկ նշանակության ջոկատը անցել է հարձակման: Գործողության ժամանակ տեղի ունեցած փոխհրաձգության արդյունքում զինված անձը սպանվել է:

Photo: Omar Mateen's MySpace account