Ջոն Քերին հայտարարել է, որ սիրիական հարցում ռուսներն իրենից խորամանկ գտնվեցին
ԱՄՆ պետքարտուղար Ջոն Քերին հայտարարել է, որ սիրիական հարցում ռուսներն իրենից խորամանկ գտնվեցին: Այս մասին գրում է New York Times պարբերականը՝ հղում անելով ՄԱԿ-ի Գլխավոր ասամբլեայի ժամանակ արված 40 րոպենոց ձայնագրությանը:
Պարբերականի համոզմամբ՝ ԱՄՆ արտաքին գերատեսչության ղեկավարի և շահագրգիռ մի քանի երկրի դիվանագետների միջև հանդիպումը տեղի է ունեցել սեպտեմբերի 22-ին՝ Սիրիայի ընդդիմության և կառավարական ուժերի միջև հրադադարի ժամկետը լրանալուց մի քանի օր անց: Հանդիպմանը Քերին մի քանի անգամ դժգոհել է, որ սիրիական հարցում իր դիրքորոշումն աջակցություն չի ստանում Սպիտակ տան կողմից: Վերջինիս հետ Ջոն Քերիի անհամաձայնությունն գործնականում գաղտնիք չէ: Ձայնագրության մեջ նա բացահայտ կերպով ասում է, որ ռուսները խորամանկությամբ գերազանցեցին իրեն: Քերին նաև ասում է, որ Կոնգրեսը երբեք չի համաձայնի ուժ կիրառել: «Մեզնից շատ ոչ ոք հիասթափված չէ: Մենք փորձում ենք գործերն առաջ տանել միայն դիվանագիտական ճանապարհով, և ես շատ եմ ափսոսում դրա համար»,- մեջբերում է New York Times-ը:
Պետքարտուղարի արած մեկ այլ հատարարություն պակաս զարմանալի չեղավ: Նրա խոսքով՝ Սիրիայի նախագահական ընտրություններին պետք է մասնակցի գործող նախագահ Բաշար Ասադը: Այս հայտարարությունը հատկանշական է նրա համար, որ հակասում է Օբամայի և Սպիտակ տան պաշտոնական դիրքորոշմանը: Քերին նշել է նաև, որ իրենք իրավական հիմքեր չունեն՝ գրոհելու Ասադի իշխանությունը, մինչդեռ ռուսական զորքը Սիրիայում է՝ հենց իշխանությունների հրավերով:
Պարբերականի համաձայն՝ հավաքի մասնակիցները հեռացել են այն համոզմամբ, որ ԱՄՆ-ից այլևս պետք չէ ակնկալել որևէ էական օգնություն:
Photo: townhall.com