Ռուսաստանի և Թուրքիայի միջև ստորագրվել է «Թուրքական հոսքի» մասին համաձայնագիր

            Հոկտեմբերի 10-ին Ստամբուլում Ռուսաստանի և Թուրքիայի միջև ստորագրվել է միջկառավարական համաձայնագիր՝ «Թուրքական հոսք» գազատարի կառուցման նախագծի վերաբերյալ: Այս մասին հայտնում է թուրքական Anadolu լրատվական գործակալությունը:

            Աղբյուրի փոխանցմամբ՝ համաձայնագիրը ստորագրել են Ռուսաստանի էներգետիկայի նախարար Ալեքսանդր Նովակը և Թուրքիայի էներգետիկայի և բնական պաշարների նախարար Բերաթ Ալբայրաքը (նա նաև նախագահ Էրդողանի փեսան է՝ աղջկա ամուսինը - խմբ.):

            Ծրագիրը նախատեսում է Ռուսաստանի Կրասնոդարի շրջանից Թուրքիա (ավելի կոնկրետ՝ Արևելյան Թրակիա) գնացող գազատար խողովակաշարի կառուցում, որն անցնելու է Սև ծովի տակով: Ակնկալվում է, որ գազատարի առաջին գիծը (15,75 միլիարդ խորանարդ մետր) սպասարկելու է թուրքական շուկան, իսկ երկրորդով նախատեսվում է գազն արտահանել Եվրոպա:

            Նշենք, որ գազամուղի կառուցման ծրագիրը սառեցված էր անցյալ տարվա նոյեմբերից, երբ Թուրք-սիրիական սահմանին թուրքական Զինված ուժերը խոցեցին ռուսական ռազմական ինքնաթիռը: Ծրագրի շուրջ բանակցությունները վերսկսել են այս տարվա օգոստոսին՝ Թուրքիայի նախագահի՝ Սանկտ-Պետերբուրգ կատարած այցից հետո: