Վլադիմիր Պուտինը ԱՄՆ նախագահական ընտրություններում «Մոսկվայի նախընտրած» թեկնածուի մասին
ՌԴ նախագահ Վլադիմիր Պուտինը «Վալդայ» միջազգային բանավեճային ակումբի պլենար նիստի ժամանակ, խոսելով Միացյալ Նահանգներում կայանալիք նախագահական ընտրությունների մասին, հերքել է այն պնդումը, թե ԱՄՆ նախագահի հանրապետական թեկնածու Դոնալդ Թրամփը համարվում է Մոսկվայի նախապատվելի թեկնածուն: Այս մասին հայտնում է ռուսական «Интерфакс» լրատվական գործակալությունը:
«ԱՄՆ-ի նախընտրական քարոզարշավում մեր ներգրավվածության վերաբերյալ պնդումներն անհիմն են: Հասարակության մեջ նման կարծիք են ձևավորում այն ԶԼՄ-ները, որոնք համարվում են Թրամփի գլխավոր հակառակորդ Հիլարի Քլինթոնի համակիրները», - ասել է ՌԴ նախագահը:
Նշենք, որ ավելի վաղ՝ հոկտեմբերի 26-ին, «Reuters» լրատվական գործակալությանը տված հարցազրույցում Դոնալդ Թրամփը, անդրադառնալով Ռուսաստանի հետ ԱՄՆ-ի հարաբերություններին, ասել էր, որ Մոսկվային համարում է ո՛չ ընկեր, ո՛չ էլ թշնամի: Նա նաև հույս էր հայտնել, որ Ռուսաստանի հետ հարաբերությունները կբարելավվեն: Միևնույն ժամանակ, Թրամփը հակառուսական դիրքորոշման համար քննադատել էր նախկին պետքարտուղար Հիլարի Քլինթոնին: «Եթե նա հաղթի, ապա ինչպե՞ս է Ռուսաստանի հետ հարաբերությունները կառուցելու: Կարծում եմ՝ Պուտինը չի հարգում Քլինթոնին, հետևաբար՝ կհրաժարվի նրա հետ բանակցել», - ասել է Դոնալդ Թրամփը:
Comment / Տեսակետ / Արձագանք / Պատասխան / Հակազդում
ԱՄՆ նախագահական ընտրությունները տեղի են ունենալու այս տարվա նոյեմբերի 8-ին: Բազմաթիվ սոցհարցումների համաձայն՝ նախկին պետքարտուղար Հիլարի Քլինթոնը զգալի առավելություն ունի հանրապետական թեկնածու Դոնալդ Թրամփի նկատմամբ: