Թրամփը օրինախախտության մեջ է մեղադրում ԱՄՆ գլխավոր դատախազին

ԱՄՆ նապագահի հանրապետական թեկնածու Դոնալդ Թրամփը ԱՄՆ գլխավոր դատախազ Լորետա Լինչին մեղադրել է օրինախախտության մեջ: Այս մասին գրում է ռուսական РИА Новости լրատվական գործակալությունը:

«Լինչը օրենք է խախտել. Նա օդանավում հանդիպել է Բիլ Քլինթոնի հետ», - ասել է Թրամփը՝ հոկտեմբերի 30-ին Լաս Վեգասում ունեցած ելույթի ժամանակ: Թրամփը կարծում է, որ նախկին նախագահի հետ գլխավոր դատախազի հանդիպումն այն բանի համար էր, որ վերջինս փակի Հիլարի Քլինթոնի «Էլեկտրոնային նամակագրության գործը»:

Նշենք, որ այս տարվա հուլիսին ԱՄՆ գլխավոր դատախազը քննադատության էր ենթարկվել այն բանի համար, որ հանդիպում էր ունեցել նախագահի դեմոկրատ թեկնածու Հիլարի Քլինթոնի ամուսնու՝ ԱՄՆ նախկին նախագահ Բիլ Քլինթոնի հետ: Անձամբ Լինչն ընդունել էր, որ այդիպիսի հանդիպումը կարող է ստվեր գցել Հիլարի Քլինթոնի էլեկտրոնային նամակագրության գործի հետաքննության վրա: Միևնույն ժամանակ, Լինչը վստահեցրել է, որ նախկին նախագահի հետ զրույցը եղել է անձնական բնույթի, և այն ոչ մի կերպ չի կարող ազդել իրավապահների գործունեության վրա: Այնուհանդերձ, Քլինթոնի գործով հետաքննությունը փակվեց՝ ապացույցների բացակայության հիմքով: