ԱՄՆ պետդեպարտամենտի աշխատակիցը հայտնվել է անհարմար իրավիճակում

Լրագրողները անհարմար իրավիճակի մեջ են դրել ԱՄՆ պետդեպարտամենտի աշխատակից Ջոն Քիրբիին, երբ վերջինս հերթական ճեպազրույցի ժամանակ հայտարարել է, որ ԱՄՆ-ը երբեք չի փորձել ազդել այլ երկրների ընտրությունների վրա: Այս մասին գրում է ռուսական РИА Новости լրատվական գործակալությունը:

            «Մենք երբեք չենք փորձում ազդեցություն ունենալ այլ երկրների ընտրությունների վրա», - ասել է Քիրբին՝ պատասխանելով լրագրողի այն հարցին, թե արդյո՞ք ԱՄՆ-ը ինչ-որ ազդեցություն է ունեցել Լիբանանի ընտրությունների վրա: Այսպիսի պատասխանից հետո «Ասոշիեյթիդ պրեսի» լրագրող Մեթյու Լին շարունակել է, - «Լավ: Երբե՞ք: 1970թ-ին նու՞յնպես չեք ունեցել»: Սրան ի պատասխան՝ Քիրբին ասել է, որ չի ցանկանում խոսել Էյզենհաուերի (ԱՄՆ-ի 34-րդ նախագահն է. պաշտոնավարել է 1953-1961թ.թ. – խմբ.) ժամանակներից:

            Նշենք, որ հոկտեմբերի 31-ին Լիբանանի խորհրդարանը երկրի նախագահ է ընտրել գեներալ Միշել Աունին: Ընտրությանը մասնակցած 127 պատգամավորից 83-ը քվեարկել է Աունի օգտին: Լիբանանի Հանրապետության սահմանադրության համաձայն՝ երկրի նախագահ կարող է դառնալ խորհրդարանի ձայների մեծամասնությունը ստացած մորանիական քրիստոնյան: